NGO leh Ex-Servicemen ten Larsap an kawm

Nimin-a Serchhip-a rawn kal Larsap General (Dr) Vijay Kumar Singh chuan tlawmngai pawl hrang hrang aiawhte leh Ex-Servicemen te kawmin an thil ngaih pawimawh hrang hrang an lo thlen.
Serchhip DC Meeting Hall-a tlawm-ngai pawl hrang hrangte Larsap in a kawmna ah hian Serchhip-a NGO Coordination Committee leh Sub-Hqrs. YMA aiawhte chuan Central sawrkar hmalaknaa India leh Myanmar ramri hung hna thawh tur thu an thlawp thu sawiin, ramri kaltlanga dan lova ruihhlo tawlhruk tam chungchang ah ramri venhimna hna thawktu Assam Rifles te uluk zawka hna thawk tura hriattir turin an ngen a. NHIDCL ten Mizoram-a kawngpui siam hna an thawh ah hmanrua (material) tha zawk an hman theihna tura hmalakpui tur leh ruihhlo dona kawnga an hmalakna te hriatpuia a theih ang anga tanpui turin an ngen bawk a. Mizoram in Myanmar leh Bangladesh atanga raltlan mi thahnem tak a kawl mek thu pawh sawiin, heng mite dinhmun enfiah tura sawrkar laipui lam mi te an rawn kal theihna tura hmalakpui tur leh Serchhip Bukpui-a Industrial Training Institute (ITI) Building sak tawh chu a nihna tur anga hman tangkai a nih theihna tura hmalakpui turin an ngen bawk a ni.

Ex-Servicemen Serchhip te pawhin nimin a Larsap an kawmna ah hian Sipai bang te har-satna an tawh hrang hrangte an lo thlen bawk a ni.