Kawng siamthat dan tur sawiho

Kumin-a ruahsur nasa leh leimin in a tihchhiat Serchhip District chhunga National Highway siam-that dan tur chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni.
Serchhip District chhunga National Highway enkawltu NHIDCL hnuaia Contractor te hi hlawm (package) thumah then kawngpui enkawl bik an nei theuh a. He NH-02 laitu Contractor te hian kawngpui an siam zawh tawh hnuah kum 5 chhung an vil zui dawn a, kumin atang hian an vil hun tur, Defect Liability Period hi a intan ta a. Nimin-a Meeting-ah hian Contractor ten kawng chhia an thawm that dan tur ruahmanna DC hnena an thehluh chu thuneitute nen an sawiho. Serchhip DC Office atangin National Highway Team te fehchhuakin kawng chhe lai zawng zawng an fang chhuak a, thla an la vek bawk a. Chung kawng chhiate chu a rang lama siam leh thawmthat nghal a ngaih avangin Contractor te hi sawi puiin Serchhip DC Office chuan hna an thawh dan tur hun bithliah an siam sak a ni.

Package-I enkawltu Contractor te hian October kar thumna ralhmain an kawng enkawlte blacktop hna thawh zawh hman an tum a. Kawng khuar lai hnawh khah hna hi tunkar chhung hian zawh hman an tum a ni.

Package 2 enkawltu Contractor te chuan an kawng enkawl china khuar thuk leh chhe zual hnawhkhah hna chu tunkarah thawh zawh an tum a. Ruah a la sur chhunzawm zel avangin kawng khuar lian vak lo awm belh zel siamthat hna chu chawl lovin an thawh reng tur thu an sawi bawk. Baktawng leh Serchhip inkar kawngpui hi November 15-ah zawh hman tum a ni a. Retaining Wall chim pawh Oct. ni 15-ah siam zawh hman an tum a. Nov. 15 atanga December 1 chhungin Sailiam atanga Keitum black topping zawhfel an tum bawk a. An tum anga a hun taka an zo fel thei a nih chuan Serchhip By-pass a leimin nasat berna hmun khawih chhunzawm nghalin hei hi nakum January thla chhunga zawh hman an inbeisei bawk a ni.