Kawng siam zo dawn hnai

Kawnpui leh Sairang inkar kawng chhe zual lai thawmthat hna chu an zofel dawn hnai niin nimin a sawrkar thuchhuah chuan a tarlang a, helai kawng siam meka a chhe nasa lai ber leh khawih harsa lai ber ni a ngaih Zoram Mega Food Park, Kham-rang bul kawngpui chu nimin khan siam a ni a, a chhe lai hi metre 100 vel niin nimin chawhnu dar 2:00 thleng khan metre 80 chu boulder a hnawh-khah ni tawhin nimin khan zawhfel vek hman beisei a ni a. Excavator 2 bakah Vibratory Roller leh Grader pakhat ve ve hmanga hna thawh a ni a, kawngpui sir tawn tawnah tuihawk luankawr (side drain) tha taka hai a ni bawk ang. Kawngpui thawmthat hna thawktu NHIDCL ten Kawnpui to Sairang road-ah One Way-a motor tlan tir an inhuam tawh angin nizan dar 6:00 atang khan Essential Commodities phur bakah lirthei ke 6 leh ke 10 nei te chu chhuah tura rih a ni a, hun a la awm chuan ke 12 nei te pawh chhuah tum a ni.