Govt. Serchhip College-ah zirlaite tan kalpui mek a ni

Sawrkar laipui-a Ministry of Micro, Small and Medium Enterprises (MSME) hnuaia kalpui mek ‘ST/SC Hub Scheme’ chungchang inzirtirna leh ‘PM Vishwakarma Training Centre’ chu Govt. Serchhip College-ah kalpui mek a ni.
Sawrkar laipui hmalakna pakhat Scheduled Tribe (ST) leh Scheduled Caste (SC) te zinga kut hnathawktute leh thalai, eizawnna bultan duh leh sumdawnna lama an hmasawn theihna tura puih leh an thiamna tihpun (Capacity Building) kawnga hmalakna, ‘ST/SC Hub’ chu Ministry of Micro, Small and Medium Enterprises (MSME) hnuaiah Govt. Serchhip College-a zirlaite-ah hlawhtling tak kalpui chhoh mek zel a ni a, he Scheme hian ST/SC tanpui ngaite leh tanpuina petu turte inkara dawhkan a siam a ni.

He Scheme in a tum (Objectives) chu Tribal mi,ST/SC te kut hnathawka eizawng tura chawikân a, an sumdawnna tihlen sak a, MSME-ho zingah an tel ve theihna tura puih te; An thiamna neih sa tihhmasawn sak leh thiamna thar zirtir belh a, tha zawka thiil siamchhuah (product) dan kawhhmuh te, an lo intodelh theihna tura anmahni kut ke ngei a eizawnna ngelnghet an neih theihna tura puih te bakah an thil siamchhuahte hralhna tur (market) tha zawk zawn sak leh hralhchhuah dan kawng kawhhmuh te a ni a. He Scheme hian Scheduled Tribe (ST) leh Scheduled Caste (SC) mi te chu a tum deuh niin a bikin puanthuitute (Weavers) leh kutthemthiamna hmanga eizawngte a tinzawn a, thalai, eizawnna bul tan duh te te chu a huam tel vek bawk a ni.

Hei bakah hian Govt. Serchhip College-ah hian MSME kaltlang hian ‘PM Vishwakarma Training Centre’ chu nikum (2024) November thla atang khan kalpui mek a ni bawk a, Training Provider (TP) NSDC-in Affiliation an pek angin, Batch Job Role pathum (3)- Carpentry, Brick Mason leh Concrete Mason-ah Training kalpui mek a ni a, tun thleng hian Batch 4 kalpui ni tawhin mi 198 in Basic Training an zo tawh a ni