Chhiahtlang Higher Secondary School building sak thar Agriculture Minister in a hawng
Chhiahtlang Higher Secondary School Managing Board in an School Building thar hawnna hun an buatsaih ah hian Bialtu MLA leh Agriculture Minister PC. Vanlalruata chuan he School hi khawtlang tana thahnem ngai tak takte zara hlawhtling thei a nih thu sawiin, “Khawtlang hruaitu khawtlang hmangaihtu tak tak kan nei hi ka lawm hle a ni,” a ti a. Bialtu MLA hmasa in tih takzet in a lo vei tawh thu leh School din a nih theih nan hma a lo lakna zarah School tha tak an nei thei chu lawmawm a tih thu sawiin, “Governing Board-ten sum leh pai mumal lo tak atanga bul lo tanin sawrkar nen tangkawpin School tha tak din a ni theih nan hma an lo la nasa hle mai a, an inpekna a ropui hle a ni. Thawktu zawng zawngte chawimawi an phu a, Governing Board nen tangkawpin khawtlang hmangaihna rilru nen hna an thawk a, School pawhin hmasawnna tam tak a nei thei a ni,” a ti.
Bialtu MLA chuan Zirna a that loh chuan a tuartu chu mipui kan nih thu pawh sawiin, “Zirlaiten zirna tha an dawn loh chuan ram hmabak a thim a ni. Education quality hi a tha tur a ni a, ram hmabak hriltu a nih avangin mi zawng zawng hian zirna tha kan ngai pawimawh tur a ni,” a ti a. “Central sawrkar hian New Education Policy a kalpui mek a, India ram zirnain khawvel ramdangte zirna a tluk ve theih nan hma a la mek a, kan tu leh fa ten zirna tha an neih theih nan Central sawrkar pawhin hma a la mek a, chumi bawhzui chuan Mizoram sawrkar pawhin zirna tha kan neih theih nan hma chak takin a la a, mipui pawhin sawrkar School kan rin ngam a pawimawh a, kan tu leh fate zirna hi ngai pawimawh zel tur leh sawrkar hmalakna te thlawp tur leh thawhpui atan kan insawm nawn leh duh a ni,” a ti bawk.
Nimin-a Chhiahtlang Higher Secondary School building sak thar hawnna hun hi School Managing Board Committee Chairman leh Chhiahtlang South VCP H. Lalrawngbawla chuan kaihruaiin Bialtu MLA lo ni tawh Er. Lalrinawma pawhin khual zahawm niin he hun hi a hmanpui a. Report atanga a lan danin August 17, 2023 khan School sakna tur laih hna hi thawh tan niin Sept. 5, 2023-ah ban phun tan a ni a, a tirah School Board dum hmanga bul tan niin Social Welfare & Tribal Affairs Department atanga sum hmuh cheng nuai 25 hmanga chhunzawm leh a ni a, a dung ft. 54 leh a vang ft. 27-a zau sak niin kumin July 8 khan sak zawh a ni. Hei bakah hian Offuce tur ft. 24 bial a sak niin MLA Fund atangin inthiarna sak a nih bakah a kawtzawl chhun a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!