ZPM OB ten sawrkar hmalakna an thlirho

ZPM General Hqrs. chuan nimin khan Office Bearers Meeting neiin an party chak zawka a kal zel dan tur leh Mizoram sawrkar hmalakna tlangpuite an thlirho.

Aizawl Vanapa Hall-a he thutkhawm hi an President Lalliansawta chuan kaihruaiin hmalam panin an kal zel niin a sawi a, “Vawiin-a kalkhawmte hi sawrkar kan siam theih nana fatute, theihtawp chhuaha campaign te kan ni a, kan thawhrimna zawng zawngte a thlawn lo. Kuthnathawktuten a rah an tel a, sawrkar hnathawkin a hun bi ah hlawh an la thei a, ram pumin kan tel mek a, chuvangin in hlu hle a ni,” a ti a. Chief Minister Lalduhoma pawhin an danglam a tul thu sawiin, “Kan kal danah fel lo lai leh tha lo lai a awm a nih pawhin inzir zel tur leh thiam zel tura beisei kan ni. Sawrkar hnathawkte nen rim taka thawkin, ram siamtha turin theihtawp kan chhuah a ni,” a ti bawk.

He thutkhawm a tel te hian Resolution 5 pass in kum 2023 December thlaa ZPM kaihhruai Mizoram Sawrkar thar siam a nih atangin kan ram leh hnam hmasawnna atana Sawrkar hmalakna te chu chhuanawm an tih thu leh an thlawp tlat thu an sawi a. Kuthnathawktute thawhrimna hre renga ZPM kaihhruai Mizoram Sawrkarin a intiam ang ngeia thlai thar hlawhtling taka a lei leh loneituten an kutkawih ngei thawhrim rah an seng thei ta te chu an lawmpui thu sawiin, “Kum lo kal zel tur atana thlai thar lei dan tur ruahmanna tha zawk siam a ni zel te hi lawmawm kan ti takzet a ni,” an ti.

ZPM kaihhruai Mizoram sawrkarin mipuite hriselna dinhmun ngaihtuah a an hmakhua ngai taka pawisa pek lawk ngai lo (cashless) a damlo enkawlna - Mipui Health Care (Mizoram Universal Health Care Scheme - MUHCS) tha tak a duangchhuak leh hman tangkai mek a nih bakah a hlawhtlinna hmel kan hmu chho zel chu lawmawm an tih thu pawh sawiin, Sawrkar tha zawk siam a nih theih nana hmalakna hrang hrang - aikal lak tihtawp, Office hun vawn dik, mumal taka sawrkar hnathawk hlawh leh bill pekchhuah a ni ta te, Sawrkar hna lak hrang hrangah party induhsak bikna awm lova Dan anga lak thin a ni ta te hi lawmawm kan ti takzet tih an sawi a. “Eirukna lakah kan Minister leh MLA te Vawiin thlenga hminghliau an la awm lo leh India rama eirukna tlem lamah Mizoram pahnihna hial kan ni thei hi lawmawm kan ti takzet a. Eiruk tlem ber na state ni thei tura tan lak zel nise kan ti.” an ti bawk.