Skywalk leh Ropeway thubuai ACB in an chhui mek

Swadesh Darshan hnuaia Sakawrhmuituai tlang-a Skywalk leh Chaltlang leh Durtlang inkara ropeway siam chungchanga thubuai chu Mizo-ram Lokayukta thupek angin Anti-Corruption Bureau (ACB) chuan a chhui mek a, chhui zawh hun tur hriat a la ni lo.

Mizoram Tourism Department thuchhuah tarlan danin Swadesh Darshan 1.0 hnuaiah hian project pahnih a awm a, Ropeway leh Skywalk te hi project hnuhnung zawk ‘Development of Eco-Adventure Circuit’ hnuaia hna 152 zinga mi an ni a. Ropeway hi Durtlang Site hnuaia hna 16 zinga pakhat a ni a, Skywalk hi Sakawrhmuituai Tlang Site hnuaia hna 19 zinga pakhat a ni. He Project atan hian Central sawrkarin cheng nuai 4953.10 a pechhuak tawh an ti a, a Project bultanna atan kum 2017 March thla ah cheng nuai 1981 leh kum 2017 September ah cheng nuai 2482 a pechhuakin kum 2018 September thla-ah cheng nuai 489 pekchhuah a ni tih an sawi a. Hna hrang hrang thawh nan hian cheng nuai 9907 ruahman a ni a, za zela 50% chu pekchhuak tawh niin thubuai tam tak a awm avangin sawrkar laipui chuan kum 2023 December thla khan he Project hi a titawp tawh niin an sawi bawk.

Tourism Department thuchhuah tarlan danin kum 2019 April chhunga pawisa pekchhuah zingah Skywalk a awm ngei a, hnathawk turin Contractor pahnih JV NEIP & Ropeway & Resorts Pvt. Ltd. leh Lushai Engineer te chu rawih an ni a, Contractor hian bill an lak tawh bakah heng bill te hi kum 2017 atanga kum 2019 chhung khan pekchhuah vek an ni.

Hetihlai hian Sawrkar hmasa hunlaia Tourism Minister Robert Romawia Royte chuan Tourism Department thuchhuah chu a dik tawk loh thu a sawi a, an sawrkar hunlaia sum pek-chhuah zingah Skywalk a tel ve loh thu sawiin, sum dang erawh an pechhuak a, ACB file-ah chiang zawkin a awm tih a sawi bawk.