Serchhip-a leimin thenfai dan tur ngaihtuah a ni
He sawihona DC Meeting Hall-a neih hi Bawrhsap Paul L. Khuma chuan kaihruaiin tunhnai ruahsur avanga Serchhip khawpui chhunga leimin liantham, la thenfai loh leh mipui tana harsatna thlen mek te chu a lem nena thlirho a ni a. District Bawrhsap leh DDMA Chairman ni bawk chuan he huna tel te chu Team anga tangho a, inpuhtawn lova leimin thenfai leh mipuite harsatna sutkian dan tur ngaih-tuaha tang tlang turin a sawm a. Bawrhsap chuan he huna tel VC, Department leh Kohhran aiawhte hnenah lawmthu sawiin, “Kan theih tawk theuha Team anga kan tan tlan zel hian khawtlang leh ram tan rah tha a chhuah zel ang,” a ti a ni.
Leimin thenfaina atan hian Kram Infracon Pvt. Ltd te chuan an lei laihna khawlte leh leipaih motor te a thlawnin vantlang harsatna sutkian nan hman an remti a. Dinthar Veng leh Darnam Veng huamchhunga leimin liantham laih nan Oil man te DDMA leh a Area VC ten an in tum sem dawn a. New Serchhip North huamchhunga leimin te pawh Company lamin paihfaiin Oil man hi New Serchhip North VC leh PWD Department ten in tum sem turin ruahmanna an siam bawk a ni.
Heng bakah hian Serchhip Tuikhuah Veng-a Baptist Church of Mizoram (BCM) Biak In thlang leimin chu kawng tan a hlauhawm avang leh Side Drain te tuihawkin a tih khuar zel avangin BCM Kohhran Serchhip chuan PCC in a min tur leh ruahin a khawih turte dan nan hmalak an remti bawk a. Hei hi DDMA lam atangin Project danga chhunzawm tura beisei a ni.
.jfif)
Comments
Post a Comment
I ngaihdan i sawi hian mipui ngaihdan i tarlang a ni!