Horticulture Minister-in MIFCO hmun a tlawh

Horticulture Department changtu Minister C. Lalsawivunga chuan nimin khan Chhingchhip a MIFCO hmunpui tlawhin MIFCO Chairman Lalthazuala Rawite leh KVI Board Chairman C. Lalremliana ten an tawiawm a ni.
Horticulture Minister hian MIFCO hmunpui hi chipchiar taka fangin, Handholding hnuaia Sawhthing sawngbawlna khawl hnathawh dan te a en nghal bawk a. MIFCO hmunhma tangkai zawka hman dan tur te enfiahin, thawktute dinhmun leh harsatna tawh dan te an lo thlen bawk a. Minister chuan Horticulture thlai hrang hrang - Sawhthing, Lakhuihthei, Sapthei leh a dangte sawngbawltu MIFCO chu Horticulture Department nen thawhhona tha tak neia kal chhoh dan ngaihtuah a tul thu a sawi a. Kut hnathawktute tana thawk an nih angin an hmunhma te hmang tangkai a, ngaihtuahna zau zawk senga, intihchak tawn dan ngaihtuah a tul thu a sawi a ni.

MIFCO Chairman Lalthazuala Rawit pawhin thawktute dinhmun a ngaih pawimawhzia sawiin, hlawh an lak hleihtheih loh chinfel dan an ngaihtuah thu te, sawrkar hmalakna zarah kum kalta atangin mumal zawka hlawh an la thei ta chu lawmawm a tih thu a sawi a. MIFCO hnathawh leh hmalakna te, loneitute tharchhuah Sapthei leikhawla sawngbawl chungchang te, Meat Processing an kalpui dan te leh sum leh pai harsatna an chinfel chhoh mek dan te a sawifiah a ni.

MIFCO chuan Chhingchhip hmunah Petrol Pump siam tumin hma an la mek a, hemi atan hian phalna pawh hmuh fel tawh niin a hmunhma an laihzawl te pawh Minister hian a tlawh nghal bawk a ni.