Serchhip District-a hri danna pek dan leh TB dona kawnga hmalakna thlirletna neih a ni
Serchhip DC Meeting Hall-a Serchhip District Task Force for Immunization thutkhawm hi an Chairman leh Bawrhsap Paul L. Khuma chuan kaihruaiin Deputy CMO leh District Immunization Officer (DIO) Lallawmkimi Chhakchhuak chuan kum 2024-2025 chhunga Serchhip District-a hri danna (Immunization) pek an kalpui dan a report a. Naupang Immunization-ah District pumpuia naupang za zela 96.24 tuamchhuah an ni a, Nu naupai 89.76% hnenah Tetanus danna leh Diphtheria danna inkawp TD vaccine pek an ni bawk. Kumin sawrkar kum kal mekah thla thum (3) chhungin Fully Immunized mi 277 an awm tawh a, Vaccine pek chungchangah Serchhip District-a hmalakna hi a tha thawkhat tih a lan thu leh Sakhuana thil avanga harsa deuh chu awm mahse, a tlangpui thuin Awareness a that tawk thu a tarlang bawk a ni.
Hemi hnu hian Serchhip District TB Forum Meeting neih chhunzawm nghal niin Serchhip District-ah December 7, 2024 atanga ni 100 chhung TB Campaign neih thlirlet a ni a. Hemi hun chhung hian Serchhip District-a TB vei leh vei loh enfiah tura Target chu mi 9863 a nih laiin TB vei thei dinhmuna ding (vulnerable population) mi 11,094 zet an endik hman a, 100% aia sang an hlenchhuak thei a ni. He Campaign chhung hian Thenzawl-ah mipa 2 leh Chhiahtlang-ah mipa pakhat ten TB an vei tih hmuhchhuah a ni a, TB 100 days Campaign hi zo tawh mahse TB Screening hi neih chhunzawm zel a nih thu District TB Officer ni bawk Dr. Lallawmkimi Chhakchhuak chuan a sawi a ni.
TB Free Village siam tura thawhhona thuthlung, Memorandum of Understanding (MoU) chu Ministry of Panchayati Raj (MoPR) leh Central TB Division, Ministry of Health and Family Welfare ten July 8, 2022-ah an sign a. Village Council hrang hrang ten anmahni huam-chhunga TB Free Village nei turin tan an la a. Mi 1000 khuaah mi 30 tal test tur niin TB vei hmuhchhuah te chuan damdawi tha taka eiin hunbi kim leh dik thlapin an ei zo tur a ni bawk. Heng bakah hian Nikshay Poshan Yojana hmangin TB veite tan hamthatna leh tanpuina an dawn tur ang te kalpui a ni ngei em tih enpui tur a nih niin TB vei te tana ei tur tha leh hrisel, Nikshay Mitra hmangin pek thin a ni em tih enpui tur a ni a. VC/LC te tan kum khatah mi engzat nge test ngai tih chhut chhuah tur a ni bawk.
Serchhip District-ah hian kum hnih (2) a zawna TB Free Village ni thei Hmuntha chuan Silver Status an dawng a, a kum khatna atana TB Free Village ni thei khaw 8 - Bungtlang, Lungpho, Ngentiang, Lungkawlh, Sailulak, Leng, Khumtung leh Serchhip Field Veng te chuan Bronze Status an dawng bawk a ni.
Serchhip District-ah hian ‘Stop Diarrhoea Campaign’ pawh kalpui mek a ni bawk a. He rua-hmanna hnuaia an hmalakna pawh nimin-a thutkhawm ah hian thlirho niin Serchhip District-a District Hospital, PHC, CHC, Health and Wellness Centre, Sub-Centre leh Clinic-ah Oral Rehydration Treatment Corner dah theuh niin a mamawh tan Zinc leh ORS lak theih a nih thu tarlan a ni bawk.
Nimin-a thutkhawm ah hian Ser-chhip District CMO Dr. LP. Malsawma bakah Health Department-a Officer leh thawktu te, Line Department Officer te leh khawtlang hruaitute an tel a. Heng hmalakna hrang hranga Serchhip District dinhmun leh an hmalakna te tarlan a nih bakah hian hmalak zui zelna tura pawimawh nia an hriat hrang hrangte an sawiho nghal bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!