Serchhip District-ah Sawhthing leina-ah Support Price vbc. 6 chuang pek a ni tawh

Serchhip District-ah kumin chhunga Handholding hnuaia Sawhthing lei chu zawhfel a ni ta a, Phase-I ah Sawhthing quintal 8845 leh Phase-II ah quintal 51,342 hralhchhuah niin Support Price cheng vbc. 6 chuang pekchhuah a ni tawh a, la pek loh vbc. 7 chuang a awm bawk.
Serchhhip District Agriculture Marketing Committee chuan nimin khan Serchhip DC Meeting Hall-ah kumin atana Handholding hnuaia Sawhthing lei kharna hun an hmang a, he huna tarlan a nih danin Sawhthing lei leh hralh hi Phase hnih-a kalpui a ni a. Phase-I ah loneitute hnenah sawrkarin Sawhthing a leisak a, kg-ah Rs. 50 hisapa leisakin Farmer te Bank Account-ah sum hi thun nghal a ni a. Phase-II erawh Support Price pe-a kalpui a ni thung a. SCC tin ten anmahni inbuaipuiin an Kudam atangin an hralhchhuak thung a, DAMC ten an pui thung a ni. Serchhip District-ah hian Sawhthing lei Phase-I ah hian Direct Purchase in Sawhthing quintal 8845 lei niin heng zinga quintal 2189 chu Sairang Buffer Stock-ah phurh a ni a. Secondary Collection Centre (SCC) atangin Buyer hnenah Sawhthing te hi hralhchhuah leh niin a hralhna atang hian Rs. 1,09,49,386 an hmu bawk a ni.

Phase-II hnuaiah hian Sawhthing hralh hi la kalpui mek a ni thung a, tun dinhmunah quintal 51,342 hralh tawh niin Serchhip District-a SCC pasarih zingah Khawlailung SCC chu Sawhthing hralhchhuak hnem ber ni mekin quintal 13,302 an hralhchhuak tawh a, Serchhip SCC chuan dawtin quintal 8411 an hralh tawh bawk a, Chhingchhip SCC chuan dawt ve lehin quintal 823 an hralh tawh bawk a, Thenzawl SCC in quintal 7394, North Vanlaiphai SCC in quintal 5558, East Lungdar SCC in quintal 4623 leh Lungpho SCC in quintal 3763 an hralh tawh bawk a. Tun thlenga Support Price pek tawh zat chu Rs. 6,01,08,104 niin la pek loh cheng vbc. 7.49 a la awm bawk a. June 30-ah tihfel vek tum a nih laiin khawchhia avangin SCC te leh farmer ten harsatna an tawk a, MAMB remtihnain July 15 thleng Invoice thehluh hun pek belh an ni.

Nimin-a thutkhawm ah hian Serchhhip District Agriculture Marketing Committee (DMAC) Chairman leh Bawrhsap Paul L. Khuma chuan sawrkar hmalakna tha taka kalpui a ni chu lawmawm a tih thu sawiin kuthnathawktute Account-ah cheng vbc. 15 vel zet a lut dawn thu leh kuthnathawktute tan malsawmna a thlen ngei a beisei tih a sawi a. Kumthar lama he hmalakna chhunzawm a nih hunah pawh DAMC Member te chu tang lehzual turin a fuih a ni.

He hunah hian Sawhthing lei leh hralh dan thlirletna hun hman a ni bawk a, harsatna an tawh dan te sawilan niin mipui tana awlsam zawk leh hlawk zawka lei leh hralh kalpui dan tur rawtna te sawiho a ni bawk.