Serchhip-ah Zu man sa Court thu angin leihbuak a ni

Serchhip Police ten tunhnaia Rakzu an man tam tham tak chu nimin khan Court thuchhuak angin leihbuak a ni.
Serchhip Police te hian thla kalta June 24, 2025-ah khan Chhingchhip-ah Rakzu litre 640 zet chu manin June 28 khan Serchhip Tuikhuah Veng-ah litre 256 an man bawk a. Heng Zu man chungchang ah hian thubuai ziaklut nghalin Serchhip District Court-a dahluh a nih hnuah a tul ang angte buaipuiin Sample te pawh enfiah turin Forensic Science Laboratory (FSL)-ah thawn a ni a, hemi bak la awm Court in tihral a remtih chin chu nimin khan Serchhip District Court-ah hian leihbuak a ni a. He hunah hian Asst. Public Prosecutor leh Serchhip Police Prosecution Branch-a Prosecuting Inspector leh a thawhpui te bakah Court-a thawktu thenkhat te pawh an tel a ni.

Serchhip District Court-a Asst. Public Prosecutor Laithanpuia chuan heng Zu man te laka thubuai ziahluh chu ngaihtuah mek ala ni tih sawiin, tun tuma an leihbuak tak te hi Court-ah enfiah tawh leh a dahna tur an neih that tawk loh avanga Court hriatpuina leh remtihna a tihral a nih thu a sawi bawk.