Kum chanve-ah nau piang 309 awmin mitthi 135 an awm

Kumin January atanga June thla chhung khan Serchhip District-ah nau piang 309 chhinchhiah niin mitthi 135 an awm bawk a, mihring 1000 zelah nau piang 3.70 awm ang an nih laiin mihring 1000 zelah mitthi 1.62 awm ang an ni bawk.
Economics & Statistic Department-a District Research Officer (DRO) Office Serchhip in an chhinchhiahna a alan danin kumin kum chanve, January atanga June thla tawp thleng khan Serchhip District-ah hian naupiang 309 awmin heng te hi mipa 155 leh hmeichhia 154 te an ni a, naupiang zinga 73 te chu thingtlang-a piang niin midang 236 te chu khawpui huamchhunga piang te an ni thung a. Birth rate chhutna atanga chhutin mihring 1000 zelah nau piang hi 3.70 awm anga chhut a ni a, mipa 1000 zelah hmeichhia 994 piang anga chhut a ni bawk.

Hetihlai hian kumin kum chanve chhung vek khan Serchhip District-ah mitthi 135 an awm nia chhinchhiah a ni bawk a, heng mitthi chhinchhiah te hi mipa 89 leh hmeichhia 46 te niin hmeichhia aiin mipa thi hi 43 zetin an tam zawk a. Mitthi an chhinchhiah zinga 80 te chu khawpui huamchhunga cheng niin midang 55 te chi thingtlang-a cheng an ni thung a. Death Rate chhutna, mi 1000 zela thi zat chhutna ah chuan 1.62 a ni bawk.

Serchhip DRO Office-a thawktute chuan kumin kum chanve chhunga Birth Rate leh Death Rate inthlauhna chu a tha lo hle tih sawiin, chawh-rualin nau piang leh mitthi inthlauhna hi pahnih vel chauh a nih thu leh mihring 1000 vela pahnih chauh a punna a ni chu a tha lo hle nia an ngaih thu an sawi a. Hei bakah hian mitthi zingah hmeichhia aia mipa thi an tam lutuk pawh thil veiawm tak a nih thu an sawi bawk a ni.