Sawrkar laipui in Scholarship sem tur sanction ta

Kum 2023-2024 leh kum 2024-2025 chhunga Scholarship la sem loh Rs. 50,42,81,000/- sanction Order chu Ministry of Tribal Affairs chuan a tichhuak ta.

Mizo Students’ Union (MSU) General Hqrs. hruaitute chuan nimin khan Mizoram Scholarship Board Secretary Dr. PL. Ramliana chu a Pisa-ah hmuin Scholarship chungchang an zawtfiah a, MSB Secretary chuan Central Secretariat, Scholarship Division Director hnen atangin Mizoram Scholarship dawn tur Rs. 50,42,81,000/- an rawn sanction tawh thu leh heng sum te hi kum hmasa (2023-2024) a sem hmabak atan cheng nuai 807.41 leh kum kal mek (2024-2025) atan cheng nuai 4235.40 anih thu a sawi bawk a ni.

Scholarship Secretary chuan Central-in Centrally Sponsored Scheme (CSS) Funds atan Digital Payment System thar, SNA SPARSH hmang tura an tih thut avangin Technical lamah harsatna tlem a awm rih thu a sawi a. A rang thei ang bera pawisa hi zirlaite hnena semchhuah tumin tan an lak thu a sawi bawk.

MZP pawhin nimin khan thuchhuah siamin Zirlaite'n a rang thei ang bera Scholarship an dawn theih nan a tul angin hma an la chhunzawm dawn tih an tarlang a, Post Matric Scholarship la dawng lo zirlai 5000 chuangte tana theihtawp chhuahtute chungah zirlaite aiawhin lawmthu sawiin, Financial Year 2024-25 pawh a rang lama sem vat a nih theih nan a hma la nghal turin Mizoram Scholarship Board(MSB) lam hotute pawh ngen nghal thu an tarlang a ni.