PWD Minister in enfiah

PWD Minister Vanlalhlana chuan Inrinni khan Mamit leh Bairabi inkar-a kawng siam mek chu a hmunah enfiahin Mizoram District pahnih inkalpawhna leh ei leh bar chawkluhna kalkawng pawimawh tak pakhat nih avangin thawmthat ngai laite thawmthat vat a tul thu a sawi a. Chak zawka helai kawng hi siam a nih theih nan Sawrkar chuan hma a lak thu a sawi bawk. PWD Minister hian Bairabi khawchhunga NIDHI Creative Infrastructure Pvt. Ltd. ten nikum atanga Four Lane National Highway siama kawngpui zauh hna an thawh mek pawh enin ram neitute nen an inkawm a, harsatna awm mek te zangnadawmna chungchanga harsatna awm te chak zawka chinfel dan turte pawh an sawiho bawk.

PWD Minister hian Bairabi Railway Station-te leh FCI Godown te pawh tlawh nghalin thawktute a kawm bakah Rel kawng siam thar te pawh a en nghal a, Bairabi atanga Aizawl panna kawng National Highway 06 dinhmun pawh enfiah nghalin hemi hmalam hian Darlak leh Tuidam kawng pawh a enfiah a, a thawmthatna hna thawh tan nan cheng nuai 20 ruahmanna siam nghal a nih thu a sawi bawk a ni.