Nov-ah Territorial Army

Mizoram-a Territorial Army din tura hmalakna kal zelah July thla attnga Territorial Army a tang tur te lakluh tura ruahman chu chhan hrang hrang vangin kumin November thla-ah sawn a ni.

Coordination & Land Search Committee-a Chairman, Lt. Col. Clement Lalhmingthanga MLA chuan ruahman lawk ang chuan Territorial Army a tang tur lakluhna hi June ni 14 atanga tan tur ni mah se, ruahsur nasa leh harsatna dangte avangin July thlaah sawn a ni a, hei pawh hi khawchhia leh thil dang vangte in November thla ah sawn leh a ni tih a sawi a. Tun dinhmunah Lunglei leh Aizawl-ah Indian Army Officer pakhat ve ve kaih-hruaina hnuaiah Company pahnih an in bun tawh a, Aizawl a mi chu Assam Rifles hmun hluiah an awm lailawk mek a, Bungbangla Tourist Lodge building-ah an awm lailawkna tur ruahman sak an ni tih sawiin, PWD leh PHE tiamin Mizoram sawrkar Department hrang hrang te chu a tul anga thawm tha turin Coordination & Land Search Committee chuan an hriattir tawh a, an tihfel hunah an insawn ang tih a sawi a. Lunglei lama mite pawh Assam Rifles hmunah an awm mek tih a sawi bawk.

Lt. Col. Clement-a chuan Territorial Army a tang turte chu November thlaah Pilot Project angin Mizo hlang 70 lak phawt an ni anga, a lehpek ah a leta tam an la leh dawn tih sawiin, TA a tang turte lakluh ni tur chiang taka ruat a nih veleh form lakchhuah hun leh thu pawimawh te Advertisement a tihchhuah a ni chauh dawn tih a sawi a ni.

Clement Lalhmingthanga sawi danin, Mizo Territorial Army awmna tur hian thutlukna siam a la ni lova, kumin chhung chuan thutlukna siam hman an tum a. Mizorama Territorial Army bul tan nan hian Company pahnih a awm dawn a, Company pakhat-ah Officer pakhat leh Junior Commissioned Officer (JCO) pali bakah Other Range 92, an vaiin mi 102 an awm dawn a. Officer dil hun chu June thla khan a tawp tawh a, Mizo tan bik ni lovin ram pum huapa dil theih a ni a, Officer 19, Hmeichhe pakhat leh mipa 18 lak an ni dawn a ni.