Myanmar atanga Zokhawthar-a raltlan kir mekin East Tuipui Bial lama raltlan an la kir thei lo

Tunhnaia Maynmar ramchhung Chin State khawthlang lama chi leh chi inkara buaina thleng chuan ziaawm lam a pan leh tak avangin Mizoram-a raltlan rawn lut tam tak te chu an kir leh tawh a, Champhai District chhimlam East Tuipui Assembly Bial chhunga raltlan rawn lut te erawh chu an la kir lo thung.

Chin National Defence Force (CNDF) in Chinland Defence Force (CDF) - Hualngoram inkulhna hmun te an kah avanga July 5, 2025 atanga Myanmar ramchhung Chin State-a buaina thleng chuan ziaawm lam a pan nia a lan avangin Mizoram chhunga raltlan rawn lut tam te chu Inrinni atang khan an ram lamah an kir leh tawh a, Zokhawthar VCP Laldinthara sawi danin Inrinni khan raltlan 2,400 vel chu Myanmar-a Chin State-ah an kir leh tawh a. Nimin lamah a hlawp ni lovin kir chho chu an awm reng niin a sawi bakah Zokhawthar a la chambang chu awm bawk mah se an tlem tawh hle niin a sawi a ni. Police chhinchhiah danin Inrinni chawhma dar 9:00 vel atanga tlai dar 5:30 thleng khan raltlan 2,319-in Tiau lui kanin Myanmar an lut a, raltlan kir lehte hi hmeichhia 1,132 leh mipa 1,197 an ni a. An lo luh lama an lo chhinchhiah ang bawkin kir lehte hi Zokhawthar Police leh Assam Rifles-te’n an chhinchhiah zel a, nimin khan chawhnu dar 12:30 thlengin mi 70 an kir chho leh tawh bawk. Police chhinchhiah dan chuan July ni 5 atanga kar kalta Ningani thleng khan raltlan 3,892 lo lut an awm nia chhinchhiah a ni.

Hetihlai hian Chin National Army (CNA) ten July 6-a Saikhumphai leh Vaphai ep-a awm Chin State a Leilet khaw bula CNDF inkulhna hmun ‘Camp Rihli’ an tih chu an kah avanga Mizoram-a raltlan rawn lut erawh an la kir lo thung a, helai hmuna inkahna thleng avang hian Saikhumphai, Vaphai leh Farkawn-a Myanmar raltlan mi 850 vel an rawn lut a, Saikhumphai YMA hruaitute sawi danin Tiau kam lehlam-a inkulh Chin National Army (CNA) mite’n raltlante hi kir chhoh an la remti lova, an thlawhhma a an tulzia sawia nimin lama kir dilte pawh chinfel tur an la neih thu sawiin, kir an la remti lo a ni.

Tunhnaia Myanmar ramchhunga inkahna thlengah khan CDF-Hualngoram mi 2 chu thiin raltlan tuma kal mi 5 te chu Tiau lui-ah hian chesualin tui-ah hian an tla nia hriat a ni bawk.