Mizoram-ah COVID-19 kai mi 4 enkawl mek an ni

Tun dinhmunah Mizoram-ah Covid hri kai enkawllai mi 4 an awm mek a, kumin ah Covid hri kai mi 11 hmuhchhuah ni tawhin an zinga mi 7-te chu enkawl dam an ni tawh.

Health & Family Welfare Department hnuaia Integrated Disease Surveillance Programme (IDSP) thuneitute sawi danin kar kalta Ningani khan Mizoram-ah COVID-19 hri kai nia rinhlelh mi 7 an endik zinga mi pakhat chuan hri a kai tih hmuhchhuah a ni a, Zirtawpni khan mi 5 an endik zinga pahnih in hri an kai tih hmuhchhuah leh niin Inrinni khan hri kai pakhat hmuchhuah leh a ni bawk a, heng hri kaite hi Aizawl District ami vek an ni a. Hri kai tih langchhuak nasa an awm lova, damlo na tak leh enkawl zui ngai lutuk an awm bawk lo niin an sawi.

Mizoram-ah hian kumin-a COVID-19 kai hmuhchhuah leh hmasak ber chu May thla laihawla mi 2 hmuhchhuahte kha an ni a. June thla chho khan hmuhchhuah leh an awm bawk a, nimin thleng khan hri kai enkawllai hi mi 4 an la awm a ni. Mizoram-ah tun thlengin Sample enfiah 19,97,739 awm tawhin heng atang hian hri kai mi 2,39,646 hmuhchhuah an ni tawh a, an zinga mi 2,38,908 te chu enkawl dam ni tawhin mi 734 in an thihpui tawh a ni.