MSU huaihawtin Aizawl-ah zirlai ten ‘Quality Education Humhalhna Kawngzawh’ an nei

Mizo Students’ Union (MSU) General Hqrs. huaihawtin nimin khan Aizawl Vanapa Hall Kawt atanga Higher & Technical Education Directorate Office Kawt thlengin ‘Quality Education Humhalhna Kawngzawh’ neih a ni a, kawngzawh hnua sawrkar nen inbiakna an neih ah sawrkar hmalakna chu tha an tih thu an sawi zui bawk a ni.

‘Quality Education Humhalhna Kawngzawh’ bultanna hi Aizawl Vanapa Hall kawt-ah neih niin Higher & Technical Education Directorate Office Kawt-ah a tawpna neih leh a ni a, he kawngzawh ah hian College hrang hranga zirlai rualte telin, ‘Unqualified Assistant Professor sawrkarin a rawih luih te hi kan duh lo’ tih leh ‘Tling lo taka Zirtirtu hnathawktute hi bang rawh se’ tiin an aurual a. MSU President B. Lalkhawngaihzuala chuan sawrkar in Unqualified Teacher te chance a pe fo chu MSU in tha a tih loh thu sawiin, tuna an chance pek pawh hi nakum-ah chance an pe nawn leh lo ang tih a sawi theihloh thu a sawi a. Ram hruaituten Central Service tling tura zirlaite an fuih reng chunga Qualified lo Ziritrtu an ruai reng chu hriatthiam harsa a tih thu sawiin, MSU ngenna Sawrkarin a tihlawhtling lo anih chuan a tawp thlenga na taka hmalak an tum thu a sawi a. MSU Vice President Roluahpuia pawhin lungawi lohna lantir chu an tum ber a ni lo tih sawiin, Dawhkan-a sawifel mai theih a nih thu leh thuneitute hnenah vawi engemawzat an thlen hnuah pawh awmzia a awm loh avangin lungawi lohna an lantir tih a sawi a. Kumin February ni 28-ah an hun pawhsei sak tawh lo tura sawrkarin Order a chhuah tawh sut lehtu chu sawrkar tho a ni tih sawiin, Zirna In sang bera Assistant Professor ni tur chuan Minimum qualification-ah NET a ni tih sawiin, kum khat ah NET vawi hnih exam a awm a, MA pass hlim te pawhin an paltlang theih paltlang theilo te chu chhawr tlaka an ngaihloh thu a sawi a ni.

Kawngzawh neih a nih hnu hian MSU hruaitute leh sawrkar aiawhte chu inbiain Sawrkar chuan Dan an zawm a ngaih thu leh MSU nawrna avanga Showcause notice an pek mek avangin hemi chinfel hnu ni nga (5) chhunga ban an tum thu an sawi avangin Resolution siamin kawngzawh hi an titawp a ni a. An Resolution-ah hian Sawrkar in heng Assistant Professors Unqualified te Dan ang taka ban an nih theih nana Showcause notice ni 15 chhung an pe chu tha an tih thu leh ni 15 a liam atanga ni 5 chhungin ban an nih tur thu an sawi chu an rintawk thu bakah sawrkar chu an thutiama ding ngei tura an ngaih thu an sawi a. “Tun hnuah Zirtirtu hnalak reng reng ah Qualified Teachers te chauh lak thin ni tawh rawh se,” tiin tuna Asst. Professor Qualify lo te aiawh tur Asst. Professor tur Qualify ngei a rang lama lak an duh thu an sawi bawk a ni.