Education Minister in ‘Quality Education Hum- halhna Kawngzawh’ lawmawm a tih thu a sawi

School Education Minister Dr. Vanlalthlana chuan sawrkar hmalak mekna thlawp chunga zirlai pawl ten ‘Quality Education Humhalhna Kawngzawh’ an nei chu lawmawm a tih thu a sawi.

Nimin-a ZPM Chhung Inkhawm neih ah Education Minister Dr. Vanlalthlana chuan Zirlai pawlte an harh thar zel tih sawiin, “Kalphung thar sawrkar hnuaiah an thikthu pawh a chhe tain sawrkar hmalak mekna thlawp chunga Vawiin-a Quality Education Humhalhna Kawngzawh an nei ta hi a lawmawm takzet a ni,” a ti a. “Tum 7 zet sawrkar hmasa ten an pawhsei sak tawh; tuna Part time-a thawk mi 29 te hi chhungkaw eizawngtu an nihna ah khawngaihna nen sawrkarin an chungah rorelin a tawp nan hun a siamsak ve leh a, Show Cause Notice pek an ni tawh,” a ti a. “Sawrkar hmasaa MPSC kaltlanga an lak thlap, Unqualified Asst. Professor, kum 2008 atanga thawk tawhte kan zirlaiten kawng an zawhpui ngam ta hi a lawmawm hle. Tuna Unqualified Part time-a thawk mi 29 an aupui bakah College pangngai, Law College leh Mizoram Polytechnic Lunglei-a Unqualified Contract Asst. Professor te pawh hi sawrkarin Show Cause Notice a pek vek tawh te an ni a. Sawrkar hmasa lama an chai tam loh, Aikal lak chungchangah te pawh zirlai pawlte an tawngchhuak ngam ta hi a lawmawm takzet. Zirtirtute attendance check ngam sawrkar a ding ta a, Kai App siam a ni bawk. Sikul Zirtirtute pawh an kal that phah a, App a result a that vang a niang e, Department zawng zawngah hman a ni ta hi a lawmawm hle a ni,” a ti.

MTET nei lo MR Teacher tam tak te pawh last chance pek mek an nih thu Minister chuan sawi bawkin, “Samagra Shiksha hnuaia Unqualified Teacher awmte pawh zawnchhuah mek an ni. Dan laka sawrkar himna turin uluk takin engkim zirchian a ni a, hemi nghak zo lo hian Vawiin ah kawng an zawh ta a, an duh angin a tih nghal vek theih loh a, sawrkar chuan hma a la zel dawn tih erawh hria se ka duh hle,” a ti a. “Hun inpe lova mi chawbel ben buaksak hi sawrkarin a duh loh avangin dan zuiin sawrkar chu a kal mai a ni. ZPM sawrkar hnuah Advertisement tel lova hna lak a awm lo mai ni lovin, School leh College-ah Unqualified Teacher lak an la awm lo. Asst. Professor atan NET emaw, Ph.D nei lo dah ngheh nan file put-up a awm tawh lo bawk. Sawrkar hmasa ah mit siai chunga Zirtirtu lak ang chi leh induhsakna awm thin ang kha a thleng tawh lova, ZPM sawrkarah chuan NET nei lo te lak a ni dawn lo,” a ti.

Kum 2019-a lak MR Teacher 800 chuang zingah qualified lo mi 100 chuang an awm thu pawh Minister chuan sawi bawkin, “Qualified tam tak an awm tawh avangin tunah hian sawrkarin last chance a pe leh mek. Sawrkar hmasa khan kum 2024 thleng an qualify ve theihna turin hun an pe a ni. Heti a nih chuan MR Teacher thenkhat, lehkha zir mek ten an tuar nghal dawn,” tiin “MZP leh MSU-te hian zirna hmasawnna tur leh kan ramin a thatpui theih nan theihtawpin hma an la thin a, a lawmawm takzet a, tha takin kan thawkho zel turah kan ngai,” a ti bawk.