Mizote inthlunkhawmna tur internet portal thar, ‘Mizo DiasporaHub’ hman theih tura hawn a ni

Khawvel hmun hrang hranga cheng Mizote inthlunkhawmna tur internet portal thar, ‘Mizo DiasporaHub’ chu nimin khan Chief Minister Lalduhoma chuan a hawng a, Chief Minister chuan he Portal thar hi a bik takin an awmna rama harsatna tawk, sawrkar inrawlh a tulna thilah a tangkai zual ang tih a sawi.

Mizo Diaspora Cell ten LushAITech nen tangkawpa an siam ‘Mizo DiasporaHub’ hawnna hun RB McCabe Hall, Aijal Club-a neih ah hian Chief Minister Lalduhoma chuan khawvel ram hrang hranga awm Zofate nena inthlunzawmna tha neih chu an rilru-ah a thi thei lo tih sawiin, “Kan sawrkar ve leh chumi lam hna thawktu tur ‘Mizo Diaspora Cell’ chu Chief Minister Office-ah kan din ta a, a tir lamah ram pawna tangkhang tanpui ngaite an theih ang angin an tanpui a. Inthlunkhawmna lam an buaipui leh a, chu an hmalakna rah duhawm tak chu Vawiin-ah Mizo DiasporaHub tiin kan lo hawng thei ta a ni,” a ti a. He Portal thar hi Welfare/Association ten tangkai takin hmang se a duh thu sawiin, “Registration lo ti vek ang che u. Inhretawnin awm ila kan duh a, tanpui kan ngaihnaah kan thawkdun anga, sawrkar thilte kan inhrilh hre bawk ang a. A bik takin an awmna rama harsatna tawk, sawrkar inrawlh a tulna thilah a tangkai zual ang. Tin, he Apps-ah hian Welfare ten an inrelbawlna lama an tangkaipui theih tura ngaih thil kan dah tel a. Hei hi Welfare te thuneihna va chuhpui emaw, va nekna atana siam a ni lem lova, an awlsamna tur siamsakna zawk a ni,” a ti a. “Kan thalai vakchhuak te lo fimkhur ula, mawi takin lo khawsa ula, in awmna ram Dan te zah takin lo zawm ang che u. Mahni awmna hmun apiangah kan Hnam timawitu nih tum zel ang u,” tiin a chah bawk a ni.

Chief Minister chuan an intiam angin an sawrkar hnuah kalphung thar an siam hnem tawh thu leh tunlai thiamna hmanga mipui leh sawrkar indawrtawnna lam a tam thu a sawi a, “Mipui Aw – Public Grievances & Redressed Mechanism te, e- Ram – Mipuiten awlsam taka Land Revenue & Settlement an dawrna app te, e-OPD – Aizawl Civil Hospital-ah online a OPD card lak theihna te, Kai Apps – sawrkar hnathawkte attendance lakna te, SDG Dashboard – Mizorama khua zawng zawng SDG status en theihna te, MPLAN – Sawrkarin hmasawnna hna a thawh zawng zawng vilna tur Apps te, ILP online te leh e-office leh filing system te an ni a. CMO-ah ngei pawh awlsam zawka document han dah that a, kan duh huna kan haichhuah leh zung zung theihna Cloud Based Filing System kan hmang der tawh a ni,” a ti bawk.

He hunah hian Diaspora Cell-a Chairman Vanlaldina Fanai chuan Diaspora Cell chu June ni 11, 2024-ah din tan a nih thu sawiin, “A tir lamah kha chuan rampawna harsatna tawk te chhanchhuah kha kan hna hmasa a ni,” a ti a. Dan ang taka ramdang-a an kal chuan harsatna an tawh pawhin hmalak a nuamin a awlsam thin tih sawiin, “Dan bawhchhiaa an kal a, man an va tawh te, harsatna an tawh chang te hian hmalak a har em em thin,”a ti bawk.

Mizo DiasporaHub chungchang sawiin Diaspora Cell Chairman chuan, “Tunah hian Welfare/Association tan Registration kan hawng mek a, hemi zawh hian mimal registration kan hawng leh ang. He portal hmang hian mi in a va vahchhuahna hnai vaia Mizo Welfare lo awm te awlsam takin a hre thei dawn a, an inkhawmna hmun te, an pawl hruaitute Contact pawh a hre thei ang. Tin, AI hmanga thuam a ni a, zawhna pawh zawh theih a ni. Engemaw rikrum thila thu inthawnna tur SOS chenin dah a ni,” a ti.

Nimin-a hawn tak Mizo DiasporaHub Portal hi play store leh apps store atanga download theih a nih bakah Website atanga luh theih a ni bawk a. Nimin-a a hawnna hunah hian Minister leh sawrkar mi pawimawh thahnem tak an tel a ni.