Kawng siamtute darkar 48 ngaihchan an tum

Joint Civil Society of Mizoram (JCSM) chuan Kawnpui leh Sairang inkar kawng chhe lai chu tawi te anih thu sawiin, rang taka siam turin NHIDCL an phut thu leh darkar 48 an ngaihchan dawn thu an sawi.

JCSM hotute chuan nimin khan Aizawl Press Club-a chanchinbumite kawmin JCM Convener Dr Lalbiakmawia Ngente chuan tun hnai July ni 19, 2025 khan Kawnpui atanga Sairang, National Highway 306 & 06 dinhmun an enfiah tih a sawi a, Kawnpui leh Sairang inkar kawngpui chhiat zia a takin a hmunah an hmuh thu sawiin, he kawngpui pawimawh, km 40 vel, Mizoram 'Life  Line' hi lirthei tan kal rual loh a nih thu a sawi a, Co-Convener Lalrammawia pawhin khuar thuk tak tak leh tuitling te, nal tak takte awm thu sawiin, lirthei tlu a awm nual bakah truck tam tak kal thei lovin ni tam tak chhung a awm tawh a, hei hian Mizoram mipui leh hnathawk te, sumdawngte ni tin nunphung a tibuai tih a sawi.

JCM Secretary Dr Vanlalsiama Chhangte chuan kawngchhe mek dinhmun atanga hmalak hmasak ngai nia an hriatte tarlangin  Kawnpui leh Sairang inkar kawng chhiat em emna hmun chu a vaiin km khat aia thui ni lova an hriat thu leh heng hmunte hi rang takin NHIDCL chu siam tura an phut thu a sawi a. Sawrkar laipui, a bik takin Ministry of Road Transport &  Highways (MoRTH) leh NHIDCL-te leh Mizoram Sawrkar-te chu rang taka hma la turin an ngen tak meuh tih a sawi bawk a. Kawngchhia avanga lirthei lian tangkhangin nasa takin Khamrang khaw mipuite tan harsatna a siam thu sawiin, lirthei a tangkhang zel a nih chuan Khamrang khua leh a chhehvel bakah Truck khalhtute eitur leh mamawh ngaihtuah sak thuai a tul thu an sawi a. NHIDCL chu darkar 48 an ngaihchan dawn thu leh hemi hnuah hian hnatlang pui an koh mai theih thu leh an la ngaihtuah leh dawn thu an sawi a ni.