Mizoram hmundangte rualin Serchhip-ah ‘Remna ni 2025’ hman a ni

India sawrkar leh MNF ten remna thuthlung an ziahna ni, Remna ni vawi 39-na chu nimin khan Mizoram hmun hrang hrangah hman a ni a, Serchhip-ah pawh MNF Serchhip East Block huaihawtin Serchhip Kawnpui VC Hall-ah hman a ni a, MNF General Hqrs. atangin hruaitu rual ten an rawn hmanpui a ni.

Remna ni puala inkhawm hi MNF Serchhip East Block President C. Lalrinfela chuan kaihruaiin he hun hmanpuitu MNF General Hqrs. a National Core Committee (NCC) Member R. Tlanghmingthanga chuan Pathian in Hnam-ah min din in ram min pek thu a sawi a, kum 1961-ah Independent Policy neiin MNF chu a lo pian thu leh MNF chu tute emaw siamchawp ni lovin Hnam-a min dintu Pathian kutchhuak an nih thu a sawi a. India sawrkar laka zalenna puan a nih dan leh hemi hnua an beih chhoh dan te sawiin, MNF chu Mizo zawng zawng lenna leh a hranpa a Member nih kher ngai lo-a an tel vekna a nih thu te, ILP chungchang leh Ramdang mi In kan ramah In hmun lo ram an neih ve theih loh dante sawiin, heng te hi zalenna an sual in a hrinchhuah a nih thu a sawi a. Heng bakah hian Civil & Criminal Law-ah India Parliament in Dan passed mah se Mizoram Assembly in a pawm ve loh chuan hman ve a remloh dan te pawh sawiin, zalenna an sual chu an duh angin hlawhtling lo mah se inremna thuthlung an neih chu Mizo tawh phawt tan chuan a hlut thu te a sawi bawk a ni.

He hunah hian MNF General Hqrs. a General Secretary J. Malsawmzuala Vanchhawng pawhin Remna ni chu Party bil ta ni lovin Mizo zawng zawng ta a nih thu a sawi a, kum 1966-a zalenna sual a nih dan leh inremna thuthlung tha tak kan lo neih chhoh tak thu te pawh sawiin, Inremna Thuthlung tam tak zingah Article 371(G) hnuaia Mizote humhimna tha takin min hung tlat avanga Vawiin thlengin remna leh muanna boruak nuam tak hnuaiah kan awm tak thu te a sawi a. Mizote chu hnam huaisen kan nih thu leh kum 20 chhung kan hnam pasaltha ten zalenna nei tura an lo beih dante, kan chhehvel a hnam tam takte chimral an nih mek laia Mizo hlang kan la awm theih chhan chu kan hnam pasaltha te lo beihna kha a nih thu sawiin, kum 1986-a Remna kan neih theihna tura hlawk taka tha lo thawhtu MZP, Kohhran, NGO leh pawl dangte chu an hmalakna chhuanawm a tih thu sawiin, Remna ni pual hian chibai a buk bawk a ni.

Serchhip-a Remna ni puala hun hman ah hian Peace Accord MNF Returnees' Association (PAMRA), Saizahawla District leh Ex-MNA Serchhip District bakah Serchhip Sub-Hqrs. YMA te atangin thusawi ngaihthlak a ni bawk a, he hunah hian MNF Party te leh Hnam Sipai te bakah mi thahnem tak an tel bawk a ni.