District Hospital Serchhip a Dialysis dahna tur tifel
Mizoram sawrkar chuan District Hospital, Serchhip-ah hian Dialysis khawl dah tura hma la mekin hemi tur hian Room te pawh tihfel a ni tawh a, TRAUMA Building chung-a Blood Bank Room lehlam chu Dialysis khawl dahna tur hian ruahman a nih thu thudawnna chuan sawiin, tunah hian peihfel thawkhat a ni tawh a, he Room-a khum leh hmanraw dang awm tur thenkhat te pawh dah a ni tawh bawk a ni.
District Hospital Serchhip-a Dialysis khawl dah tur hi District Hospital Mamit atangin lak a ni dawn niin Mamit atanga thudawnna chuan a sawi a, thudawn danin Indian Oil Corporation Ltd. (IOCL) chuan Corporate Social Responsibility (CSR) Fund 2024-2025 atangin National Health Mission (NHM) kaltlangin Mamit District Hospital-a hman turin Kal thuah faina (Dialysis) khawl pali an pe a, heng khawl pali hi Mamit District Hospital-ah phurh thlen vek a ni tawh chungin bun (install) theih a la nih loh avangin District dang damdawi In-a hman tura lakchhuah leh a ni a, khawl pahnih chu District Hospital Serchhip-a dah turin phurhchhuah a ni tawh a, a dang pahnih chu Champhai District Hospital-a dah tura tih a ni bawk.
Mamit-a District Medical Superintendent chuan heng khawl te hi IOCL lam chuan June thla chawhma lam thleng kha an nghah thu a sawi a, Hospital building hi luah luha khawl hi bun theih ala nih loh vang leh IOCL lamin hman tangkai a ni tih hriatna (Utilization certificate) an phut tawh avangin a bun theihna tur hmun danga dah rih mai chu NHM thuneituten tha zawka an hriat vanga hetianga ruahmanna thar hi awm ta niin a sawi a. NHM Mizoram Director chuan Mamit District Hospital-ah hian Dialysis khawl hi dah leh ngei a nih tur thu a sawi bawk a ni.