MGNREGA-ah hna 5,758 thawh tan a ni tawh

Sawrkar kum kal mekah MRNREGA hnuaiah hna 5,758 thawh tan a ni tawh.

Nimin khan Rural Development & Administration Department changtu Minister Prof. Lalnilawma hovin State Employment Guarantee Council (SEGC) chu Aijal Club-ah an thukhawm a, he hunah hian MGNREGS hnuaia hnathawhte thlirlet niin sawrkar kum kal mek, 2025-206 atan hna 5,758 thawh tan tawh niin chung zinga hna 3,326 chu thawh zawh tawh a ni tih tarlan a ni a. Job Card 2,13,197 pekchhuah tawh zingah Job Card nung 2,12,676 awmin heng zingah hian hna thawk thei (Active Worker) 2,13,444 an awm a ni. Tunah hian Mission Amrit Sarovar Phase-II kalpui mek niin hmun 131-ah Dil thar siam leh a awm sa siamthat (renovation) nan hmalak mek a ni a. Social Audit Report atangin MGNREGS hna thawh kawnga harsatna hrang hrang tawhte leh chinfel an nih thu tarlan a ni bawk.

He thutkhawm kaihruaitu Minister Prof. Lalnilawma chuan SEGC chu Mahatma Gandhi National Rural Employment Guarantee Act (MGNREGA), 2005 hnuaia hnathawhte endik leh thlirlet hna thawk tura din a nih thu sawiin, Department hrang hrang nen tangkawpa mipui leh khawtlang tana tangkai tur hna thawk tur an nih thu a sawi a. Mipuite’n an chhawr tangkai ngei tur hna uluk zawka thlanchhuah leh thawh kawngah State Level leh District Level-a Convergence Committee-te’n thawhhona tha an neih a pawimawh zia a sawi bawk.