Mat Phai-a Nul nei te tan thupek tihchhuah a ni

Serchhip District Magistrate chuan Serchhip Mat Phai-a Nul siamtute tana zawm tur thupek a tichhuak.
    Hemi chungchanga nimin-a thupek a tihchhuah ah hian Serchhip District Magistrate Paul L. Khuma chuan Serchhip Mat Phai-a Nul leh chawhmeh hmun siam thin mi thenkhat ten Pangang hlo (Pesticide) fimkhur lo takin an hmang thin tih hriat a nih thu leh mi thenkhatin zu leh ruihtheihthil siamna remchanga an hman thin bakah ramngaw leh nungchate tichereu zawngin hma an la thin tih report dawn a nih thu a tarlang a. Heng te hian mipui vangtlang hriselna a nghawng theih vang leh mipuite tan hnawksak a nih theih bakah harsatna lian tak a thlen theih avangin Section 152 of Bharatiya Nagarik Suraksha Sanhita, 2023-in thuneihna a pek angin Serchhip Mat Phai-a Nul leh thlai hmun siama eizawng thin ten ramngaw leh nungchate ti chereu zawngin hma an la tur a ni lo tih tarlangin, Thlai hmun siam leh Nul siam hi Zu leh ruihtheihthil siamna remchangah hman tur a nih loh thu pawh a tarlang a. Pangang hlo (Pesticide) te chu fimkhur taka hman tur a nih thu leh Pesticide an hman atangin thlai lak hun tur dik takah an thlai te an seng tur a nih thu pawh tarlangin, Serchhip Mat Phai-a Nul leh thlai hmun nei/enkawl thin ten midang tan harsatna an thlen tur a ni lo tih a tarlang bawk. He thupek zawm lo te chu Section 223 of Bharatiya Nyaya Sanhita, 2023 dan hmangin hrem theih an ni ang.