Kumin chhunga sawrkarin thlai thar lei a kalpui kharna hun nimin khan buatsaih a ni

Kumin chhunga sawrkarin thlai thar lei a kalpui kharna hun chu nimin khan buatsaih a ni a, June 27 thleng khan Sawhthing quintal 233,604 lei a ni tawh.

I&WRD Conference Hall, Aizawl-a sawrkar in thlai thar lei a kalpui kharna inkhawm hi Chief Minister Lalduhoma chuan hmanpuiin thlai thar lei chu a bul tan kum a nih thu leh inzir chunga an kal thu sawiin, “Kan hlawhtling thawkhat hle,” a ti a. “Thlai pali kan han tinzawn a, mahse Mizo Buh pawh hi kan titel thei ang kan ti a, kan han titel hram a. Thlai panga kan lei ta a ni. Heng thlai thlan bik 5 zingah hian Sawhthing leh Hmunphiah ah tlem han khaih lak zeuh a awm tih loh chu a dang pathum ah hian harsatna kan tawk lo. Hmunphiah a kan buaina bul chu Grade-a then tur kan ti kha a ni a. Loneituten chu chu an harsat a, tunhnuah chuan Grade a then tawh loh kan ti ta a ni,” a ti bawk.

Kumin February ni 20 atanga Sawhthing lei kalpui a nih atangin nimin kha thla 4 leh ni 10-na chiah a nih thu Chief Minister chuan sawiin, “Tunah chuan a mothar a awm tawh si a, khar rih mai hi thain kan hre ta a ni,” a ti a. “Sawrkar kan insengso nasa a, cheng vaibelchhe za vel hi kan senral ka ring. Kan theih tawka kan hralh ve bakah hian Central sawrkar Market Intervention Scheme atangin cheng vbc. 9 vel kan hmuh ve kan beisei thung. Kan loneitute hi kawng lakah kan kalsan dawn lova, nakum lamah pawh kan kalpui zel ang,” a ti a. Nakum lam pawh khi a market a la tha dawn lova an hriat thu sawiin, “Mahse kan kal zel dawn. A rate chhiat kum-a loneitute veng tura he Policy hi siam a ni a. A rate that kumah chuan kan inrawlh a ngai lo zawk ang,” a ti a. “A rate a lo chhiat khan he policy hian a thil tum a tihlawhtling a, loneituten rilru hah miah lovin Rs, 50/- in an hralh thei a ni. Kum khat leh a chanve chhunga mipuite hnena pawisa thlen tam ber sawrkar kan niin ka ring,” tiin “A thlawna dawn tumna a bo a, mi thawkrimte tan erawh chuan bituk awm miah lova sum lakluh theihna a ni,” a ti bawk a. Hei bakah hian Environment tichhe lo zawnga Loneih kan kalpui thiam deuh deuh a ngai tih a sawi bawk.

He hunah hian Agriculture Minister leh MAMB Chairman PC. Vanlalruata pawhin hlawhtling taka thlai thar an lei chu lawmawm a tih thu a sawi a. Adviser to Chief Minister leh MAMB-a Co-Chairman Dr. KC. Lalmalsawmzauva chuan kumin-a thlai thar an lei dan tarlangin, Mizo buh quintals 1473 leiin cheng nuai 44 vel sawrkarin a seng tih a sawi a. Sawhthing bikah June 27 thleng khan quintals 233,604 leiin nimin thlenga an la buk thu a sawi a, an lei tawh chinah sawrkar in Support Price cheng vbc. 96.4 a pe tawh a. Aieng quintal 400 leiin Hmarcha leisak ngai an awm lo a. Hmunphiah-ah Empanelled buyers ten quintals 10552, Non-Empanelled buyers ten quintals 27277 leh ZOHANCO kaltlangin quintals 2498 lei a ni a. Hemi bikah hian sawrkarin cheng vbc. 2 a seng a. Kumin hi India rama Sawhthing market chhiat kum a nih thu leh a hralhna hmunpui Bangladesh a lo buai bawk si avangin harsatna a awm thu sawiin, kumthar ah chuan tha zawka an kalpui an inbeisei tih a sawi bawk.