Health Sunday & Hospital Sunday hman a ni

Nimin Pathianni kha Mizoram Presbyterian Kohhran ni pawimawh, Health Sunday & Hospital Sunday (Damdawi In Pathianni) a ni a, Kohhran hrang hrangah he ni pual hian hun hman a ni.
Mizoram Presbyterian Kohhran chuan Hospital Sunday hi kum 1928 atangin a hmang tan a, kum 1981 atangin July thla Pathianni hmasa ber chu Hospital Sunday atan hman a ni bawk. Hetihlai hian kum 1985 Synod Inkhawmpui thu angin kum 1988 atang khan January Pathianni hnuhnung ber chu Phâr Pathianni (Leprosy Sunday) atan hman thin a ni a, kum 2004 Synod chuan natna dangte pawh huamin 'Health Sunday' tiin a thlâk ve leh a. Kum 2008-a Synod-in ‘Health Sunday leh Hospital Sunday hi Pathianni vawi khatah a ruala hman ni se’ tia a rel angin kum 2010 atangin July Pathianni hmasa berah Health Sunday leh Hospital Sunday hi hman a ni ta a ni.

Synod Hospital thuchhuah tarlan danin, Health Sunday leh Hospital Sunday pual hian Synod Hospital chuan damdawi In awm man pe thei lo chhungkaw khawsak harsa te bill a peksak thin a, kum 2020 atanga kumin thlengin damlo 3259 pek sak tawh niin heng zingah hian damlo 2263 chu Presbyterian an ni a, damlo 996 chu Kohhran dang an ni a. Kumin June 30 thleng khan damlo mi 480 awm man ba an la awm a, hei hi a vaiin Rs. 203,59,678 a ni.