Champhai-ah Kudam-a bukna te enfiah a ni

Champhai DCSO hnuaia Supply Kudam te chu nimin khan Addl. DC K. Zorammuana leh District Civil Supply Officer (DCSO) CC. Sakhawliana te chuan an enfiah.

Nimin-a District Food and Civil Supplies & Consumer Affairs Kudam a buhfai bukna an endiknaah hian buhfai Retailer hnena semchhuah a nih hmain buk a tling ngei em tih finfiah nan bukna khawl (Digital Weighing Scale) hmanga buk hmasak vek a ni a, buk tling ngeia pekchhuah a ni a, he hunah hian Legal Metrology, Champhai District Consumer Union leh Retailer Association aiawhte pawh an tel a ni.

Bukna enfiah hunah hian Champhai Addl. DC K. Zorammuana chuan mipuiin an dawn tur buhfai buk tling ngei an dawn chu sawrkarin a ngai pawimawh hle tih sawiin, mipuiin an dikna chanvo an chan theihna turin kudam-a hnathawktute chuan retailer hnena an pekchhuah hmain buk tling ngeia pechhuak tura chahin, Retailer te pawhin buk tling ngeia an lakchhuah theihna turin uluk taka lo enpui thin turin a chah bawk a. Buhfai buk tling ngei chauh lak a nih theih nan buk tir nachang hre thin turin mipuite a chah bawk a ni.