Aizawl-a Lirthei intlanchhawk dan enchhin tum

Aizawl khawpui-a lirthei intlanchhawk dan kalpui mek chu thla khat chhung atan kawng dangin enchhin a ni dawn.

Nimin khan Chief Secretary Khilli Ram Meena kaihhruaiin Co-ordination Committee on Traffic Management chu CS Conference Hall-ah an thukhawm a, he hunah hian Aizawl khawpui chhunga Traffic tiziaawm tura lirthei intlanchhawk chungchang ngaihtuah niin kum 2019 atanga lirthei intlanchhawk an kalpui mek chu Aizawl khawpui chhung kawngpui (main spine) viz., Bawngkawn to Kulikawn via Chal-tlang or Ramhlun through Chanmari, Zarkawt, Dawrpui leh Sikulpuiawn; Sikulpuikawn to Chanmari West via Temple Square, Vaivakawn leh Hunthar chauhah enchhin nan (trial) thla khat chhung kalpui turin an rel a ni.

Hei bakah hian Two Wheeler leh LMV Taxi-te pawh sticker 3 - A, B leh C hmanga intlanchhawkin kar khata ni 2 tlan loh ni nei thin chu kar khata ni khat chauh tlan loh ni an neih theih nan sticker 5 – A, B, C, D leh E hman nise tia rel a ni a. Hei pawh hi thla khat chhung enchhin tur niin August thlaa kalpui tura ruahman a ni a. Heng bakah hian lirthei tlan loh ni a m-pass hmanga tlan theihna permit pek chungchang ngaihtuah niin, m-pass chu essential services tan chauh pek tawh nise tia rel a ni bawk.