Zu khapna Dan siamthat kalpui zel dan tur sawiho

Mizoram Liquor (Prohibition) Amendment Act 2025 kalpuina tura hmachhawp hrang hrangte chu nimin khan sawiho a ni.

Planning & Programme Implementation Department Committee Room-a hemi chung-chang sawiho a thutkhawm hi Mizoram State Policy Coordination Committee-a Vice Chairman leh Adviser to Chief Minister Dr. KC. Lalmalsawmzauva chuan kaihruaiin Mizoram chhung ngeia thei tharchhuah hmanga thianghlim leh mumal taka Wine siamchhuah a nih theih nan Mizoram Liquor (Prohibition) Amendment Act 2025 chu duan a nih thu a sawi a. Thei tharchhuaktute tan inhralhna tha zawk buatsaih sakte, hemi kawnga hma la tura Entrepreneur hip nan te, zin mite hip nan leh dan leh tehfung hrang hrang behchhan chunga thianghlim taka Wine sawngbawl a nih theih nan hemi kaihhnawih Sawrkar department hrang hrang te, Winery neitute leh kuthnathawktute tanrualna a pawimawh thu a sawi a ni.

He thutkhawm ah hian MSPCC member-te bakah Excise & Narcotics Department, Commerce & Industries Department, Horticulture Department, Food & Drugs Administration, All India Wine Producers Association, Department of Food Technology, Mizoram University leh Winemaker aiawhte an tel a. Excise & Narcotics Department-a Commissioner Z. Lalhmangaiha chuan Mizoram-a Zu khuahkhirhna lo kalpui tawh thin dan leh Mizoram Liquor (Prohibition) Amendment Act 2025 danglamna te Powerpoint Presentation hmangin a tarlang a, he dan thar hian Autonomous District Council-a huam thu a sawi a. Food & Drugs Administration atangin Wine leh Beer kaihhnawih a Food Safety and Standard Authority of India hnuaia inkaihhruaina hrang hrang ngaihthlak niin Wine-ah chuan Ethyl Alcohol chu za zelah 7 - 15.5 a nih tur thu leh Beer-ah chuan za zela 5 - 8 a nih tur thu tarlan a ni a. Mizoram-ah Winery 4 a awm thu sawiin, chungte chu Hnahlan, Champhai, Tlangsam leh Sesawng te a ni.

Hmalakna hlawhtling taka kalpui a nih theih nan thei chi khat, a huhoa hmun khat a chin (Cluster approach) a pawimawh tur thu te, a sawngbawl kawnga endikna kalpui dan tur te, a sawngbawltu turte leh zuar turte phalna (license) pek dan tur te sawiho a ni a. Winery lam a tui, bultan tumte leh Winery-a thawk tur ten thiamna rintlak an neih theih nan MSPCC thukhawm chuan Training buatsaih sak thin nise an ti bawk.