UPSC Prelim-ah Aizawl Centre atangin 8 tling

Union Public Service Commission (UPSC) hnuaia Civil Service Examination, 2025 Preliminary result-ah Aizawl Exam Centre atangin mi 8 an tling.

    Niminpiah tlai khan UPSC Civil Service Exam Preliminary result hi tihchhuah niin hriat theih chinah Aizawl Exam Centre atangin mi 8- KC. Zalena, Lalfakzuala, Lalremsiama Darchhun, Liansonjem Dousel, Lalremsiami, Lalrinpuia, Vanlalawmpuia leh Siddharaj te an tling a ni. UPSC 2025 Preliminary Exam hi kumin May ni 25 khan neih a ni a, ram pumah candidate nuai 10 velin Exam hi an hmachhawn a, result hi UPSC website, upsc.gov.in-ah a en theih a, Prelims paltlang candidate 14,161 te chuan August ni 22 khian Civil Services (Main) Examination an hmachhawn leh dawn a ni. Main Exam paltlang te hian Interview an hmachhawn leh dawn a, heta tang hian All India Service leh Central Civil Service hrang hrangah thlan thin an ni a. Interview neih hun tur erawh tihchhuah a la ni lo thung.