The Mizoram Drug Treatment & Rehabilitation Centre Accreditation Rules hmang turin inbuatsaih mek

Social Welfare Minister Lalrinpuii chuan, Ruihhlo Do chu ZPM Party policy a nih angin sawrkarna an chan atangin theihtawpin hma an la tih sawiin, Home leh Centre te mumal zawka kalpui turin ‘The Mizoram Drug Treatment & Rehabilitation Centre Accreditation Rules’ hmang turin an inbuatsaih mek tih a sawi bawk.

Social Welfare Minister Lalrinpuii hian nimin khan ZPM party Chhung Inkhawm ah Ruihlo Do chu ZPM Party policy a nih angin Pathian leh mipuite zara Sawrkarna an chan tirh khan Chief Minister kaihhruaina hnuaiah hmalak nghal a ni tih a sawi a, State Level Ruihlo Do Committee lo muthlu tawh chu kaitho lehin hmalakna thuang hnih - Supply Reduction, Demand leh Harm Reduction-ah an then tih a sawi a. “Supply Reduction lam hi Excise Department chan niin, Demand Reduction hi Social Welfare Department chan a ni a. Manifesto bawhzuiin theitawpin hma kan la mek a ni,” a ti a. “Nasha Mukh Bharat Abhiyaan leh National Action Plan for Drugs Demand Reduction Scheme kan kalpui bakah Central Sawrkar Scheme ringawt kan ram tan a tawk loh avangin Kohhran leh NGO-te nen tanghoin Sawrkar chuan theihtawp a chhuah mek a ni,” a ti.

Home leh Centre te mumal zawka kalpui turin ‘The Mizoram Drug Treatment & Rehabilitation Centre Accreditation Rules’ hmang turin an inbuatsaih mek tih pawh Social Welfare Minister chuan sawiin, “Home hrang hrang enkawltute training kan pe a, anni pawh an inhawng hle a ni. Aizawl khawpuiah ruihhlo avanga harsatna tawk an thahnem hle tih kan hria a, he harsatna sukiang tur hian ‘Hulhliap Short Stay Centre’ din nise kan ti a, hetah hian ni 10 chhung chu Doctor leh Nurse te enkawlna hnuaiah Detoxification kalpui a ni anga, ni 5 dang Psychologist ten councelling an kalpui leh anga, ni 5 dang chu Spiritual councelling neihpui tum a ni,” a ti a. Hemi hnu hian an dinhmun a zirin an chhungte hnena haw thei tura buatsaih an tum thu leh la inpeih lo deuhte chu Centre a awm chhunzawm tura an ruahman thu a sawi.

Social Welfare Minister chuan Mizoram Synod in Synod Revival Camping Centre, Neihbawi chu he Hulhliap hmun atan hman phalsak an nih thu pawh sawiin, “Tum khatah mi 200 vel zel enkawl theih kan tum a, thlatin Batch thar zel enkawl tum a ni. Bultanna tur sum leh pai mamawh chungchangah pawh Chief Minister Pu Lalduhoma a inhawng hle a, Party, mipui, NGO leh Kohhran ten theihtawpa min tawiawm turin ka ngen a ni,” a ti bawk.