Thawnthu insawisiakna buatsaih a ni dawn

Serchhip District chhunga hmun mawi kan neih te hmanga thawnthu insawisiak chu kumin hian buatsaih tum a ni.
Mizoram Tourism Department chuan August 8, 2025 hian ‘Narrating Mizoram : Tales of Our Land (A story telling competition)’ tih inelna a buatsaih dawn a. Hei hi District hrang hrang aiawhte inelna tur niin Serchhip District aiawhtu thlanna tur inelna buatsaih dan tur chu nimin khan Serchhip DC Meeting Hall-ah Bawrhsap Paul L. Khuma hovin sawiho a ni a. He Meeting hian hemi atana inelna hi Serchhip District Level-ah chhawng hnihin buatsaih nise tiin a chhawng khatna ah Serchhip Sub-Headquarters YMA bultumin YMA Branch hrang hrang te inelna chu July 15 ralhmain buatsaih nise, a titha zual 10 thlang-chhuakin a chhawng hnihnaah District aiawhtu tur DC hovin thlanchhuah nise an ti a ni.

District Level inelnaah hian lawmman siam a nih dawn bakah State Level-ah hian lawmman pakhatna atanga pathumna siam a ni dawn a. Serchhip District-ah hian thupui thlanchhuah sa atanga panga (5) thlangchhuakin Mizo Culture nena inhmeh, khualzin mi te hip theihna tur thawnthu awmsa leh a hmunhma nawmna sawichhuak thei tura inel a ni dawn a ni. Heng thupui thlansa te hi Tawi Tlang, Tawi Puk, Chhuanthar Baktawng, Khawbel. Khuai Kham, Ngentiang Puk, East Lungdar Tlang, Tuichang lui, North Vanlaiphai, Para-gliding Site - Zawlpui leh Thenzawl te a ni.