Serchhip District-ah Dharti Aaba Abhiyan kalpui
Sawrkar laipui chuan mipuite tana hmasawnna Scheme hrang hrang a ruahman chu a hmang tur dik takin an hman tangkai theih nan uar thei ang bera puangzar tur leh zirtir turin June 15 atanga June ni 30, 2025 chhung hian Campaign nei turin ruahmanna a siam a, Serchhip District-ah chuan khaw thlanbik 23 ah mipuite khawsak chawikan hna thawktu Department hrang hrang aiawhte chu nimin atang khan an fehchhuak tan a. Serchhip RD Block-ah Block Development Officer (BDO) Dr. Malsawmtluanga Fanchun leh East Lungdar RD Block-ah BDO Dr. Peter Malsawmtluanga te kaihhruaiin Team 2-a in thenin a tahtawlin nitin, ni 15 chhung Official te an fehchhuak dawn a ni.
Nimin khan Serchhip RD Block chhunga Chhingchhip leh Hualtu-ah te Campaign neih niin Vawiin hian Keitum leh Bungtlang-ah neih chhunzawm a ni anga. E. Lungdar RD Block ah pawh nimin khan Khawlailung leh North Mualcheng khuaah Campaign neih niin Vawiin hian Lungchhuan-ah Campaign chhunzawm a ni dawn a. Mipuite chu he Campaign hi ngai pawi-mawh tura beisei an ni bawk.
PM DAJ-GUA hi nikum October ni 2, 2024 khan Prime Minister Narendra Modi chuan Jharkhand-ah a lo hawng tawh a. He Scheme in a tum chu Tribal zinga harsa zualte kawng hrang hranga chawikanna leh hmasawnna tura hmalak niin hemi chungchang inzirtirna leh inhrilhhriatna 'Awareness Campaign' hi khaw hrang hrangah June ni 15-30 chhunga neih tur a ni a. He hunah hian Awareness Campaign mai bakah mipuite chu an mamawh ang service te Line Department ten an kawtkaiah an chhawp chhuahsak dawn bawk a ni.