Serchhip-ah World Blood Donor Day hman a ni
Blood Bank, Serchhip leh Association for Voluntary Blood Donation (AVBD) Serchhip Branch te buatsaiha ‘World Blood Donor Day’ puala hun hman hi AVBD Serchhip Branch-a Secretary T. Biak-chamliana chuan kaihruaiin he huna thu sawitu Serchhip Blood Bank Officer Dr. Lalruatliana Pachuau chuan ‘World Blood Donor Day’ hman a nih chhan leh thisen pe turte tana hriat tur pawimawh hrang hrangte a sawi a. thisen pe turte tana hriattur pawimawh hrang hrangte sawiin, thalaite chu thisen pek uar zel turin a fuih bawk a ni.
He hunah hian AVBD Serchhip Branch-a President, Zonunsanga Kawlni pawhin AVBD din chhan leh an hnathawh hrang hrangte sawiin, damlo ten an mamawh hun apianga a thlawna thisen an dawn theihna tura hma an lak thin dan leh mi tlawmngai te avangin Serchhip Blood Bank chu Mizoram-a Blood Bank hrang hrang zingah a thlawna thisen pek dawng tam ber pawl a nih thin thu a sawi a. Thisen chu a aiawh tur la siam-chhuah loh, mihring in kan inpek tul a nih avanga mi hrisel, thisen pe thei ni tura hriselna vawn that a pawimawh thu te sawiin, midangte nun chhan nana thisen pek uar zel turin a sawm bawk.
‘World Blood Donor Day’ hi June 14-ah hman thin ni mah se kumin hian sawrkar Pisa chawlh a nih avangin Mizoram-ah chuan nimin, June 13 khan hman a ni a. Sawrkar kum liamta, April 1, 2024 atanga March 31, 2025 chhung khan Ser-chhip Blood Bank chuan Blood Donation Camp tum 36 huaihawtin thisen Unit 646 lakkhawm a ni a, Kohhran thalai hrang hrang ten vawi 22 zet Blood Donation Camp an nei a, Zirna In hminga thisen pek tum 11 awm bawkin Sawrkar Office hminga thisen pek tum thum a awm bawk.