Serchhip-ah MPF District buatsaihin ‘Seminar on Good Governance’ neih a ni
PCI Serchhip Kawnpui Kohhran Diamond Jubilee Hall-a ‘Seminar on Good Governance’ neih ah hian Bawrhsap Paul L. Khuma chuan hetiang hun Serchhip-a buatsaih a ni chu lawmawm a tih thu leh hun lo kal zel turah pawh buatsaih fo tha a tih thu a sawi a, ‘Good Governance’ tih chu inrelbawlna tha tihna a ni ber tih sawiin, kentel erawh a ngah thu leh Transparency, Accountabilitym, Effectiveness, Efficiency, Inclusiveness leh Corruption-free practices bakah thil hrang hrang a kentel thu a sawi a. Heng te hi mipuite tana hna an thawhna kawngah tha taka an thawh theihna tura a pawimawh thu leh min mamawhtute tana a theih dan kawng zawnpui hram thinte chu a pawimawh thu a sawi a. Mizoram sawrkar ah ‘Digital Transformation’ kalpui chhoh mek a nih thu pawh sawiin, The Mizoram Right to Public Services Act te pawh siamin hman tangkai a pawimawh thu a sawi a. Sawrkar in Khapna Thupek a siam thin te pawh sawrkar atang ringawt chuan a hlawhtlin a harsat thin avangin mipuite nen tantlan a tul thu sawiin, Good Governance atan hian harsa tam tak awm mah se kan beih tlan hram hram a tul thu te a sawi bawk a ni.
‘Seminar on Good Governance’ hi MPF Serchhip District-a President Rev. Zairemkima chuan kaihruaiin Resource Person atan MPF General Hqrs. a General Secretary Rev. Lalram-liana Pachuau chu hman a ni a, “Good Governance in a sawi tum ber chu sawrkar rorel leh thutlukna siam te, a bawhzui zel dan te a tha tur a ni’ tih a ni ber tih sawiin, chutiang taka rorel leh hna thawk chu ‘Sawrkar tha’ a ni tih a sawi a. Mizoram-ah sawrkar tha kan neih theihna turin MPF in hma a lo lak tawh dan te pawh tarlangin, kumin hian MPF dinna District hrang hrangah Seminar hi buatsaih aan tum thu a sawi a. Hei bakah hian zirna In-ah te pawh a remchan anga buatsaih zel an tum thu a sawi bawk.
Nimin-a he hun hman ah hian MPF Local Forum leh VC te bakah sawrkar Department te tel tura sawm niin chawhnu lamah sawrkar tha nei tura pawimawh te an sawiho bawk a ni.