Serchhip-ah ‘Ek Ped Maa Ke Naam’ hawnna nei
‘Ek Ped Maa Ke Naam’ hawnna hunah hian Serchhip District Plantation Committee-a Member Secretary leh DRDO Project Director Dr. Malsawmtluanga Fanchun chuan he hun an hman chhan sawiin, nu (mother) te puala thingphun an nih thu leh nute chu min chawi liantu leh kan duat tur an nih angin kan chenna hi kan duat let ve tur a ni tih inzirtirna a nih thu a sawi a. Khawvel thang zelah kan ramngaw te kan ti chereu nasa a, chu chuan nghawng nasa tak a nei a, kan chhehvel ramngaw chhe zel kan siam that theihna tur chu thing kan phun belh leh enkawl chhunzawm nachang kan hriat hi a nih thu a sawi bawk.
He hun hi Serchhip District Urban Development Officer (DUDO) Gaston Vanlalhriatpuia chuan a kaihruai a, Serchhip Joint VC aiawh te, Chhim Veng leh Chanmari VC te bakah SHG te an tel a. He hmalakna hawnna neih a nih hnu hian Zotawna Park bakah hian thingtiak phun nghal niin a vaiin thingtiak 50 phun a ni a, he hmalakna hnuaiah hian P&E Veng-a Shelter for Urban Homeless-ah te, New Serchhip Primary School leh Chhiahtlang Higher Secondary School-ah te thing tiak 195 phun tum a ni bawk.
Heng thingtiak an phun te hi AMRUT 2.0 hnuaiah Self Help Group ten tha taka an enkawl chhunzawm tur a ni a. World Environment Day denchhenin he hun hi hman niin Green Mizoram Day-ah thingtiak te hi phun leh a ni ang.
Tarlan tawh angin he hmalakna hi thawh thum-a kalpui tur a ni a, May 21 atanga 23 chhung khan thing phunna tur hmun thlengin June 5 atanga August 31 chhungin thingtiak phun a ni anga, kum khat atanga kum hnih chhung chu thingphunte enkawl chhunzawm hun chhung atan hman a ni anga. Mizoram-a hmun 46-ah SHG member 518-ten thingtiak hi an phun dawn a ni.