Bialtu MLA leh Chief Minister Lalduhoma’n Serchhip Bial-a chhiatna thlenna hmun a tlawh
Chief Minister Lalduhoma hian nimin zing khan Serchhip rawn thlengin Serchhip DC Meeting Hall-ah District Bawrhsap Paul L. Khuma leh District Official pawimawhte nen tunhnai ruahsur nasa avanga Serchhip District dinhmun tlangpui an sawiho a, he hunah hian Serchhip District Bawrhsap Paul L. Khuma chuan tunhnaia ruahsur nasa vang hian Serchhip District-ah In chhe vek 25, In chhe nasa 19 leh a thenlai chhia 18 awmin hmun him zawk pana insuan chhuak chhungkaw 108 leh leimin report 150 a awm thu a tarlang a. Hei bakah hian Leilawn (bridges) 5, Public Water Tank 2 leh Tuikhur 18 bakah Retaining Wall chim 20 a awm bawk a ni.
District thuneitute nen inkawmna an neih hnu hian Chief Minister leh amah zuitute hian Serchhip P&E Veng-a In chimna hmun te, Chanmari Veng-a In chimna hmun te, Tuikhuah Veng-a leiminna hmu te, Sesah lui-a chhiatna thlenna leh Dinthar Veng-a In chimna hmun te a tlawh a, hemi hnu hian Buangpui pan lehin Buangpui Mini Community Hall-ah khawtlang hruaitute leh Official te nen an inkawm bakah chhiatna thlenna hmun te a en bawk a. Neihloh khua pan lehin khawtlang hruaitute nen an inkawm bakah khawchhung an fang bawk a. Tunhnaia ruahsur avang hian Neihloh khua hi tlawhpawh theih lohvin an awm reng a, nimin khan kawng hi tlang chiahin Chief Minister hian a tlawh nghal a. Neihloh atang hian Thenzawl pan lehin chhiatna thlenna hmun hrang hrangte a tlawh leh a, hemi hnu hian Aizawl a pan leh nghal a ni.
Heng khaw hrang hrang a tlawhna ah hian Chief Minister chuan chhiatna leh harsatna thlenga hma an lakna ah Serchhip DC leh a thawhpui te, Official te, tlawmngai pawl leh khawtlang hruaitute chungah lawmthu a sawi a. “Heng khuarel chhiatna a lo thlen hian kan intanpui a, kan inpeizawn liam liam a ngai thin. Tun tum chhiatna vanga hnamdang khualzin, kawnga tangkhangte pawhin Mizo mipuite chet dan an fak viauin ka hria a, kan inpuih tawn thinna ri hi a ring hle a ni,” a ti a, Sawrkar chuan theihtawp chhuaha hma a lak zel dawn thu leh vanduaina tawk te hnena tanpuina pek tur chite pawh a rang lama pein Central sawrkarah pawh a rang lam an thlen tur thu a sawi bawk.