Scho sem hun tur la hre lo

Mizoram Scholarship Board hotute chuan kum 2023-2024 Tribal Scholarship thawh lina chu sawrkar laipui atanga sum dawn ala nih loh avangin sem hun tur hriat theih ala ni lo tih an sawi.

Mizoram Scholarship Board hotute chuan Tribal Scholarship-a zirlaite pek tur sum chu sawrkar laipuiin zaa 90 tumin a bak zaa 10 chu State sawrkar in a tum thin tih an sawi a. Scholarship sum pek turah hian State sawrkar atanga chuan sum an hmu tha thin viau a, tunah hian 2023-2024 Tribal Scholarship pek turah sawrkar laipui-a Tribal Affairs Ministry lamin sum an neih tawh loh avangin Finance lamah an dil mek a, anni in sum an pek hunah dawn ve mai an rin thu an sawi a ni.

Mizoram Scholarship Board hotute chuan kum 2023-2024 Tribal Scholarship-ah hian Mizoram in a dawn tur atangin zaa 79 vel sawrkar laipui atangin dawn a nih tawh thu leh zaa 21 vel an la dawng lo tih an sawi a, tuna an sum dawn hmabak hi a vaiin cheng vbc. 8 vel a ni tih pawh sawiin, sum hi Finance Ministry lamin a pekchhuah hunah dawn theih thuai beisei a nih thu an sawi a. Hei bakah hian kum 2024-2025 atana Zirlaite Tribal Scholarship dawn tur pawh sawrkar laipui-ah Estimate thehluh a nih tawh thu an sawi bawk.

Kum 2023-2024 Tribal Scholarship hi Mizoram-a zirlai 4027 in an la dawn loh avangin MZP General Hqrs. chuan May 12, 2025 khan Mizoram Larsap hnenah Tribal Scholarship thawh lina chu zirlai ten an dawn thuai theih nan hma lakpui turin an lo ngen tawh a. MZP in an chhinchhiah danin Tribal Scholarship 2023-2024 hi diltu zirlai 31,685 zinga 26,909 in an dawng tawh a, la dawng lo zirlai 4027 an la awm a ni.