Ruahtui tla avangin Serchhip District-ah In chhia leh leimin tam tak a awm

Tunhnaia ruahsur nasa avangin Serchhip khawpui-ah chhiatna nasa tak a thleng a, leimin hian In engemaw zat a tihchhiat bakah mi pakhat in nunna a chan a, inkalpawhna kawngpui engemaw zat chhiain Eng pekna leh Tui pekna te pawh a chhe nasa hle a ni.

Zirtawpni kalta atanga Serchhip leh a chhehvel a ruah nasa tak sur avang khan Serchhip P&E Veng-ah chenna In pathum chu luahzui tak lohin a chhia a, Serchhip P&E Veng, Soil Peng bula leimin in Zomuani chenna In a hnawl ah a nuta Ramzolura chu a boral phah a, Serchhip Dinthar Veng-ah Inrinni khan In pali chu leimin in hnawlin nimin khan In pahnih a hnawl leh a, Dinthar Veng-ah hian In engemaw zat luahzui ngam loh la awmin Chawngbuangi Memorial School pawh a thlanglam nasa takin a min a, Sesah lui-a mihring kal laina Lei dawh pawh a chhe vek bawk a ni. Serchhip Chanmari Veng-ah chhungkaw pahnih te luahlai In pahnih chu leimin hian bungrua engmah chuh hman lohin a hnawl a, mihring erawh an him thung a ni. Serchhip Field Veng-a chhungkaw pali te chenna In chu luahzui ngam loha awmin In pakhat chu thiah a ni a, Serchhip Chhim Veng ah chhungkaw pakhat chenna In chu lemin in a hnawl chhe vek bawk a ni.

Heng bakah hian Serchhip khawpui chhungah Serchhip Tuikhuah Veng-a lei tlahniam thin chu che lehin a chhaka BCM Serchhip Biak In chu dinhmun hlauhthawnawm ah dahin bungrua te thiarchuah a ni a, a bula Mizoram UPC Pastor Quarters pawh bungrua thiarchhuah niin helai a leimin hian Govt. Serchhip College Bus chu a tichhe bawk a ni. Serchhip AOC Veng-ah In saklai pakhat chu chhe vekin In dang pawh luhzui ngam loha chhuahsan a ni a, Serchhip Vengchung ah chhungkaw pathum in an chenna In chhuahsanin hmun him lam an pan a, Serchhip Hmar Veng-ah chhungkaw pakhat chuan an chenna In chhuahsanin hmun him lam an pan bawk a ni.

Serchhip District chhunga khaw dangah pawh leimin leh a kaihhnawih chhiatna thleng a awm nual a, Zote South-ah leimin in chenna In pakhat hnawlin mi pakhat in hliam tenau a tuar a, Buangpui khua ah leimin engemaw zat awmin chhungkaw thenkhat ten an chenna In an chhuahsan bawk a, Neihloh khua ah chhungkaw pakua in an chenna In an chhuahsan bawk a ni. Thenzawl khua ah leimin avanga harsatna thleng a awm hriat ni lo mah se Lau lui lian in In engemaw zat a chim leh bawk a ni.

Bungtlang khua ah leimin in chenna In pakhat a hnawl a, Lungpho khua ah chhungkaw panga ten an chenna In chhuahsanin hmun him lam an pan a, Thinglian khua ah In pahnih chu dinhmun hlauhthawnawm ah a awm avangin thiah a ni bawk. Heng bakah hian Khawbel, Ngentiang, Rullam leh Baktawng-ah te pawh leimin report dawn a ni bawk.

Tunhnaia ruahsur nasa avang hian inkalpawhna kawng pawh a ping nual a, Serchhip khawpui atanga Keitum lam panna leh Thenzawl lam panna chu Inrinni atang khan ping vekin lirthei leh khualzin an tangkhang nasa hle a, heng te hi nimin khan lirthei kaltlang theiha thenfai a ni hlawm a, ruah a sur leh a nih erawh chuan ping leh mai thei dinhmun ah a ding thung a. Serchhip by-pass road-ah leimin nasa tak awmin lirthei kaltlang theih a ni lo bawk. 

Heng bakah hian Chhiahtlang atanga Vanchengte panna kawng te, Chhingchhip leh Thentlang inkar kawng leh Thentlang leh Sialhau inkar kawng te chu leimin hian a hnawh a, Khawlailung leh Hmunzawl inkara Tuichang Lei pawh a chhe bawk nia thudawn a ni.

Heng chhiatna leh vanduaina thlenna hmun hrang hranga hian sawrkar Department leh khawtlang mipui ten chhawmdawlna hna an theih ang angin an thawk nghal a ni.