RIPANS (Aizawl) behchhana damdawi In sak hna zo tep

Sawrkar laipui Ministry of Health & Family Welfare sum hmanga Regional Institute of Para-Medical & Nursing Sciences (RIPANS) behchhana damdawi In sak mek chu a building sak zawh a ni tawh.

Prime Minister Narendra Modi sawrkar kum 11 chhunga Mizoram chhunga hma-sawnna hnathawh pawimawh tling pha RIPANS hmuna khum 100 chuang awmna tur damdawi In sak hi a In ruangam sak zawh tawh a ni a. A chhung chei chhoh mek a nih bakah damdawi In-a awm tur khawl leh bungrua chi hrang hrangte lei mek a nih thu RIPANS-a Faculty Member Dr. H. Lalrinmawia chuan a sawi a. RIPANS Hospital-ah hian damlo khum pangngai bakah damlo na zualte dahna tur bik khum 5 awmna Intensive Care Unit (ICU) a awm dawn a. Khum pathum awmna Trauma Care leh khum pathum tho awmna Triage Observation awm tura ruahman a nih bakah khum pasarih awmna Nau neihna Ward-te leh khum pali awmna a hranga damlo dahna Isolation Ward te nen a vaiin khum 121 a awm dawn niin Dr H. Lalrinmawia chuan a sawi..

RIPANS hi Aizawl hmar lam Zema-bawk-a Nursing, Pharmacy leh Paramedical chi hrang hrang zir theihna a ni a. India hmarchhak a hetiang zirna awmchhun a nih avangin hmar-chhak State hrang hrang atangin zirlai engemaw zat an awm thin a ni.

Hriselna lam hmasawnna atana Prime Minister Narendra Modi sawrkar hnathawh tam tak zingah Mizoram-ah Ayushman Bharat hmang tangkaitu mi 5,17,000 an awm mek a. Mirethei zawkte'n an damloha cheng nuai nga thleng man chawi lova kum khat chhunga an inenkawl theihna tura ruahman, Ayushman Bharat PM-JAY pawh hmang tangkaitu tamin damdawi man tlawm taka lei theihna, Jan Aushadhi Kendra dawr 15 hawn a ni tawh bawk a. Medical College pawh sawrkar laipui tanpuina a din a ni tawh bawk.