Rel kawng endikna Report thehluh a ni tawh

Hortoki leh Sairang inkar Rel kawng him leh him loh endikna report chu thuneitute hnenah thehluh a ni tawh.

Helai hmuna Rel kawng siam thar Rel tlanna atana a him leh him loh endiktu Commissioner of Railway Safety (CRS) Northeast Frontier Circle Sumeet Singhal chuan Hortoki leh Sairang/Sihhmui Rel chawlhhmun inkara Rel kawng siam thar him leh him loh a endikna report chu tunhnai khan Ministry of Railways-ah thehlutin an pawmpuina nghah mek a ni. Northeast Frontier Railway (NFR) thupuangtu Chief Public Relations Officer (CPRO) Kapinjal Kishore Sharma-a'n Akashvani Aizawl a hrilh danin June ni 6 leh ni 10 inkar, ni 5 chhung khan CSR Sumeet Singhal hian Hortoki leh Sairang Rel chawlhhmun inkar a Rel kawng siam thar hi a him tawk leh tawk loh a endik a. A endikna report hi a endik hna zawhfel tuk Nilaini, June ni 11 khan Ministry of Railways-ah a thehlut a. Pawm a nih hnuah chuan Rel hi Bairabi atangin Aizawl khawpui daifem Sairang/Sihhmui Rel chawlhhmun thlengin a lo lut tawh dawn a ni.

Hetianga Rel kawng siam thar a him tih finfiah a nih a, Rel a tlan hnu chuan June thla chhung a nih loh pawhin July thla hi chuan hawn a ni tawh dawn niin NFR thuneitute chuan an sawi a. Prime Minister emaw, Railways Minister-in emaw hawng tura ngaih a ni.

Nikum July thla chawhnu lam khan CSR Sumeet Singhal tho hian Bairabi leh Hortoki inkar Rel kawng siam zawh hlim a him leh him loh a lo endik tawh a. Nikum vek August thla bul lam khan a him tawk tih report a thehluh chu Ministry of Railways in a lo pawmpui tawh a. Hortoki leh Sairang inkar Rel kawng siam hna hi Sairang bula Lei dawh lai a chim avangin a khawtlai ta a. Tun thla-ah endik leh theihin an peih ta chauh a ni.

Bairabi leh Sairang inkar rel kawng hi Rel kawng lian chi niin kilometre 51.38 a thui a ni a, mihring leh bungraw phur Rel Mizoram a lut hian State sum leh pai dinhmun mai bakah mihring leh bungraw kal kual vel ti danglam dawrh tura ngaih a ni.

Bairabi atanga Sairang-ah hian Rel chawlhhmun pali a awm dawn a. Bairabi atanga a hlat zawng tehin km 16.38-ah Hortoki Rel Chawlhhmun; km 26.10-ah Kawnpui Rel chawlhhmun; km 37.12-ah Mualkhang Rel chawlhhmun leh a tawpna km 51.38-ah Sairang Rel chawlhhmun (Sihmui chhak) te an ni a. Sairang Rel chawlhhmun hi Terminal Station – Coach-te enkawla a tul anga siamthatna hmun tura ruahman niin he Station-ah hian Passenger ten Rel an lo channa tur ringawt Platform 3 awm tura ruahman a ni a. Line 7 - Passenger line 3, Bungraw phur (Goods Line) line 3 leh Maintenance & Service line 1 lai a awm dawn a. Bungraw phur bik tan pawh Goods Platform siam a ni dawn a ni.