PM Modi-a hnuaia hmuh a nih thu BJP in sawi

BJP Mizoram State President Vanlalhmuaka'n Mizoram-a hmasawnna tha leh rotling neih mek te chu Prime Minister Narendra Modi-a kaihhruaina hnuaia hmuh te a nih thu a sawi.

BJP Mizoram in nimin-a kar thar Inhlanna leh Political Session an neih ah he thu hi sawiin BJP State President Vanlalhmuaka chuan Prime Minister Modi-a kaihhruaina hnuaiah Sairang-ah Rel a lo luh theih tak thu leh Double Lane tha tak tak laih mek a ni bawk tih a sawi a, Aizawl Traffic Jam tih ziaawmna tur, Aizawl By-Pass Road atan pawh Mizoram chu sum pek a ni tawh a, hna thawh mek a nih thu sawiin, BJP Sawrkar hnuah Mizoram chuan Infrastructure Development nasa takin dawng a ni, a ti. 

PM Scheme kaltlanga mi retheite'n hamthatna an dawn tur chu a nihna anga hman a nih thin loh avangin mirethei te leh mipui PM Scheme chhawr thei ten a nihna ang takin an chhawr thei thin lo tih pawh sawiin, a bikin 'Housing For All' hmanga In sak tanpuina dawng te'n an la sa zo thei lo tih a sawi a. Heng zawng zawngte thlîr hian Mizoram mipuite harh a hun takzet a, Mizoram-ah BJP-in Sawrkarna an chan loh vanga an chan tur ang an chang theilo thin chu pawi a tih thu a sawi bawk.