MUHCS hnuaiah damlo mi 8251 inenkawlna senso Rs. 9,24,66,141 pek sak an ni tawh

Mizoram Universal Health Care Scheme (MUHCS) hnuaiah June ni 3,2025 thleng khan damlo mi 8251 inenkawlna senso Rs. 9,24,66,141 pek sak an ni tawh a. MUHCS hi Mizoram chhunga sawrkar damdawi In zawng zawngah hman theih anih bakah Private Damdawi In 9-ah hman theih a ni bawk.

Mizoram Health Care Society (MHCS) hotute sawi danin MUHCS hnuaiah hian June ni 3,2025 thleng khan damlo mi 8251 inenkawlna senso Rs. 9,24,66,141 pek ni tawhin damlo inenkawlna pek sakte hi AB-PMJAY hnuaiah damlo 6295 senso Rs. 5,19,43,844, Contributory (MUHCS a inziaklut) mi 1068 hnuaiah damlo enkawlna senso Rs. 1,79,30,348, Sawrkar hnathawk mi 548 te enkawlna senso Rs. 1,19,00,256 leh pensioner mi 340 te enkawlna senso Rs. 1,06,91,693, an vaiin damlo mi 8251 te enkawlna senso Rs. 9,24,66,141 a ni a. Mizoram Health Care Society-a thawktute chuan damlo inenkawlna bill hi April-ah Rs. 1,09,52,454, May thlaah Rs. 5,55,65,481 leh June thlaah Rs. 2,59,48,206 an pe chhuak tih an sawi a. Zawhna chhangin Mizoram Health Care Society thawktute chuan bill pekchhuah kawngah tun thlengin harsatna an la tawk lo tih an sawi a, payment hi tum 8 an ti tawh niin an sawi bawk. 

Mizoram Universal Health Care Scheme (MUHCS) a inziaklut zat zawhna chhangin MHCS thawktute chuan AB-PMJAY ah chhungkua 216,584 inziaklut sa an ni a. hei bakah hian pensioners 80,082, sawrkar hnathawk nghet leh Provisional Employee te zawng zawng, CSS/GIA te bakah inziaklut thar (contributory) chhungkaw 5082 te an ni tih an sawi a. MUHCS-ah hian June 2025 thleng inziahluh theih anih avangin tun thla tawpah chuan inziaklut hi hei ai hian an tam zawk an ring tih an sawi a. Chutih rualin Mizoram-ah Ration Card nei mi nuai 2 vel awm anga ngaih anih avangin inziak lut erawh an pung lutuk lo mai thei tih an sawi bawk.

Mizoram Health Care Society chhinchhiah chinah phai lama inenkawl tura tirh (refer) mi 689 an awm tawh a. Heng refer zinga mi 204 te bill tlingkhawm Rs. 1,89,13,642 chu pek fel tawh a ni tih sawiin, damlo thenkhat chu MUHCS hman hmaa lo kal tawhte an nih bakah inenkawl mekte an nih avangin bill pek hi tlem angin a lang niin an sawi bawk.

MUHCS hi Mizoram chhunga sawrkar damdawi In zawng zawngah hman theih anih bakah Private Damdawi In 9- Serkawn Damdawi In, MED AIM Champhai, Lairam Christian Medical Centre (LCMC) Lawngtlai, Christian Hospital Lawngtlai, Maraland Gospel Centenary (MGC) Siaha, Vohbik Care, Raphaa Day Care, 360 Hospitality leh Nazareth, Aizawl-ah te hman theih a ni a. Hei bakah hian Mizoram pawna damdawi In 28-ah te hman theih a ni tawh bawk.

Mizorama District 11 awm zingah Aizawl District-ah MUHCS hnuaia damlo iunekawlna senso hi sang berin damlo 5,163 te senso Rs. 5,40,21,747 pek a ni tawh a, Hnahthial District chu damlo enkawl tlemna ber niin damlo mi 65 te senso Rs. 3,12,250 pek a ni tawh bawk.

District hrang hrang leh Mizoram pawna MUHCS hnuaia damlo enkawl zat leh sum pek chhuah zat :

District Damlo zat Sum pek (Rs.)

Aizawl 5,163 5,40,21,747

Champhai 587 30,13,814

Hnahthial 65 3,12,250

Khawzawl 89 4,10,000

Kolasib 444 29,33,099

Lawngtlai 220 34,69,068

Lunglei 616 39,06,320

Mamit 252 12,14,665

Saitual 130 5,82,596

Serchhip 295 18,60,509

Siaha 186 18,28,431

Phai 204 1,89,13,642

Total 8,251 9,24,66,141