Mizoram Police hnuaia thawktu tur mi 259 lakna chu zawhfel niin result tihchhuah a ni

Mizoram Police hnuaia thawktu tur mi 259 lakna chu zawhfel niin Inrinni khan result tihchhuah a ni.
Tun tuma Mizoram Police hnuaia thawktu tur lakna ah hian Constable (UB) 51, Constable (AB) 200 leh Constable (Mechanic) 8 lak tura tih niin Hmeichhia, MRHG, Ex-Servicemen leh Meritorious Sports Person te tan quota siam a ni bawk a, dilna lut 15,311 awmin mi nu 14,055 ten Admit Card an la a, Constable (AB)-ah dilna 13,604 lutin Constable (UB)-ah 14,054 leh Constable (Mechanic)-ah 86 a lut a. March 10 atanga 26 chhung khan Physical Efficiency Test (PET) & Physical Standard Test (PST) neih a ni a, mi 8037 ten an paltlang a ni. Hemi hnu May 3, 2025 khan Written Exam neih niin mi 7475 an inlan a, an zinga mi 442 te chu Personal Interview hmachhawn turin an tling leh a, heng mite tan hian May 23 atanga June 4 chhungin Personal Interview neih leh a ni a, heng atang hian mi 259 te chu tling ah puan an ni.

Tun tumah hian Hmeichhia (UB)-ah mi 16 tlingin MRHG atangin UB-ah mi 5 leh AB-ah mi 12, an vaiin mi 17 an tling a, Ex-Servicemen atangin UB-ah mi 2 leh AB-ah mi 4, an vaiin mi 6 an tling bawk a. Meritorious Sportsperson atangin UB-ah mi 2 leh AB-ah mi 10 tlingin Unreserve (General) UB-ah mi 26 leh AB-ah mi 174, an vaiin mi 200 an tling a, Mechanic-ah mi 8 an tling bawk a. Heti hian UB-ah mi 51, AB-ah mi 200 leh Mechanic-ah mi 8 an tling a. tlinga puan tak te hia, Medical test leh Police verification an paltlang a la ngai bawk dawn a ni.

Mizoram Police hotute chuan Recruitment felfai, langtlang leh dik neih anih theihnan Mizoram sawrkar-in hetiang lama rintlak leh tawnhriat lo nei tha tawh Infoclab Solutions Private Ltd, Delhi ami chu rawih an nih thu an sawi a, langtlang leh felfai taka he Recruitment hi kalpui niin, pawnlam inrawlhna pakhatmah awm lovin, a titha apiang (merit ang chiahin) tlinga puan an ni tih an sawi a. Recruitment chhung hian, document lem hmang leh mi aia lo inlan (impersonation) te pawh man chhuah niin Criminal Case pali (4) ziahluh (register) a ni a, heng thil diklo a inhnamhnawih mi sawm (10) man an nih thu an sawi bawk.