Mizoram mi pathum lakah NIA in Chargesheet thehlut

National Investigation Agency (NIA) chuan ralthuam, silaimu leh puak thei thil hel pawlte hnena Mizoram chhung leh pawna tawlh thin mi 3-te lakah chargesheet an thehlut nawn.

Heng mi 3 - Vanlaldailova, Lalmuanpuia leh Albert ti a koh Lalrinchhunga te lakah hian NIA chuan tunhnai khan chargesheet an thehlut nawn leh a. An pathum hian Mizoram mi niin, nikum December ni 6 khan an chenna In an dapna-ah Silai, a mu leh puakthei thil chi hrang hrang hmuhchhuah a ni a, man zui nghal an ni. Manipur a hel pawlte hnena ralthuam pe thinah an pathum hian NIA chuan an puh a, hel pawl hnena ralthuam an pek avang hian chi leh chi inkara buaina chu a sosan phah niin an puh bawk. Hei bakah hian ralthuam leina atan pawisa khawnin an thiltih hian ram leh mipui muanna leh himna a tichhia niin an sawi a. Vanlaldailova hi silai leh a mu zawrh phalna nei a nih hmang tangkai a midang a thurualpui pahnih Lalngaihawma leh Lalmuanawma te Manipur a ralthuam tawlhtirah puh a ni.

Lalmuanpuia leh Lalrinchhunga-te hi ralthuam tawlh kawngah an phusa hle a, hel pawl te hman tur ralthuam an tawlh bakah Lalrinchhunga hi dan kalha ralthuam siam leh a chhe siamthat thiamte nena inzawma puh a ni. NIA hian kum 2023 December thla a thubuai an ziahluh hmasak ber khan Lalngaihawma leh Lalmuanawma te hi hmarchhak bakah Delhi thlenga ralthuam tawlh ah an lo puh tawh a, Lalngaihawma lakah hian nikum July thla khan charge sheet thehlut tawhin ralthuam tawlhtu a puh dang Solomona lakah nikum November khan charge sheet an thehlut leh bawk.

Kar kalta Thawhtanni khan New Delhi Patiala House Courts-a NIA Special Court-ah Vanlaldailova, Lalmuanpuia leh Lalrinchhunga te lakah hian chargesheet thehluh nawn leh a ni a. An pathum hian Indian Penal Code (IPC), the Arms Act of 1959, Explosive Substances Act of 1908 leh Unlawful Activities (Prevention) Act 1967 hmanga thubuai siamsak an ni.