LENKAWL ADS (Computer zir duh tan 6) :

Health & Family Welfare Department hnuaia Integrated Disease Surveillance Programme (IDSP) in an chhinchhiah danin rannung leh tui atanga hri kai theih natna zingah Rannung seh natna chu Mizoram mipuiin an vei tam ber a ni.

Tunlai hian Mizoram hmun hrang hrangah rannung seh natna, Scrub Typhus vei an tam nia hriat a ni a, Aizawl khawpui chhunga damdawi In thenkhata Casualty leh OPD-a inentir zingah rannung seh natna vei hmuhchhuah an awm nual a. IDSP in an chhinchhiah chinah kumin chhungin he natna vei hmuhchhuah hi mi 5945 an awm tawh a ni. IDSP in an zirchianna atanga a lan danin, rannung leh tui atanga hri kai theih natna zingah rannung seh natna chu Mizoram mipuiin an vei tam ber a ni mek a, nikum chhung khan he natna vei hi mi sing 15,969 an awm a ni.

IDSP hotute chuan rannung seh natna hian kumtluanin Mizoram a chenchilh a, chutihrual chuan vei an tam zual hun lai chu June atanga December thla inkar a nih thu an sawi a. Mizoram-ah Scrub Typhus vei an pun chhoh zel avangin he natna kai lo tur hian thianghlimna kawngah tanlak a tul thu an sawi a; he natna pu darhtu tuhrik leh rannung dang Sazu te In leh a chhehvela an awm lohna tura In chhung tihfai uluk a tul thute, ram hna thawk thinte pawhin an hnathawh kawr te chu an suk fai that a tul thu te an sawi bawk.