LMC Board of Councillors thutkhawm neih a ni

Lunglei Municipal Council (LMC) Board of Councillors (BoC) chuan nimin khan Convention Centre, Lunglei-a BoC Meeting Hall-ah thutkhawm neiin hmalakna tur hrang hrang an sawiho.

He thutkhawmah hian LMC-in kum 2024-2025 chhunga Parking Fee a hmuh Rs. 18,31,349/- atanga BoC-in hmanna tur a ruahman sa Rs. 4,86,275/- bak hmanna atana LMC Traffic & Transport Co-ordination Committee (TTCC)-in a rawtna chu sawiho a ni a. Tui luankawr khuhna tha lo siam thatna atan, kawng leh kawng sir ke-a kalna daidanna pal (railing) rawng hnawihna atan, kawngpui luan chin baka lung phahna atan, kawng kual laia darthalang (convex mirror) dahna atan leh kawng lai cheina leh tilang fiahtu eng (reflector/road stud light) vuahna atan te a hmang tura rawtna chu an pawmpui a. A tul ang ruahmanna kalpui turin TTCC kutah dahin, khawpui laili deuh leh a tul zual laiah hna thawh hi bul tan tha an tih thu an tarlang bawk.

Lunglei Municipal Council (LMC) Board of Councillors (BoC) chuan The Mizoram Street Vendors (Protection of Livelihood and Street Vending) Regulations, 2017 chu Lunglei Municipal Council huamchhungah hman turin lungrual takin an pawm tlang a. The Lunglei Municipal Council Licensing Regulations, 2024-in a sawi angin LMC huamchhungah sumdawng reng rengin phalna an neih ngei a ngaih thu leh phalna nei lo sumdawn khap a nih thu tarlan niin, raltlante bik chu phalna hian a huam loh thu leh dawr luah leh khawlaia sumdawn nan pawh phalna pek theih an nih loh thu tarlan a ni a. Hemi chungchangah hian tuna dan pawm tak hmang hian fel taka hmalakna kalpui tura rel niin, a tul anga lo bawhzui turin LMC Chief Executive Officer (CEO) Donny Lalruatsanga ruat a ni. Nimin-a LMC Board of Councillors thutkhawm hi an Chairman Lalzui-thanga chuan a kaihruai a ni.