Hrangturzo Bialtu MLA in a Bial chhunga khuarel chhiatna tuartute dinhmun a enfiah

Hrangtuzo Bialtu MLA leh Adviser to Chief Minister Lalmuanpuia Punte chuan nimin leh niminpiah khan a Bial chhung khaw hrang hranga tunhnaia khuarel chhiatna thleng tuartute a tlawh a. Khawtlang hruaitute nen inkawmin harsatna thleng hrang hrang sutkianna tura hmalak dan tur a sawipui nghal bawk.

Hrangtruzo Bialtu MLA hian niminpiah khan tunhnaia ruah nasa tak sur avanga Bungtlang khuaa leiminin chenna In a hnawl te, NHIDCL kawng siam avanga chhiatna hrang hrang thleng leh leimin hlauhawm zual laite a hmunah a enfiah a, Khawlailung Chekawn leh N. Mualcheng khuaa chhiatna hrang hrang thlengte pawh a hmunah enfiahin, khawtlang hruaitute leh Kuthnathawktu, khuarel chhiatna avanga harsatna tawk mekte nen an inkawm a, Leilet siamtute leh huan nghet nei mi engemawzatin tunhnaia ruahsur nasa tak kha tuarin, an huan thlai leh Leilet engemawzat a tihchhiat thu te MLA hnenah hian an thlen a ni.

East Lungdar-a Leilet neitute nen an inkawmnaah Bialtu MLA Lalmuanpuia Punte chuan, tunhnaia ruahsur nasa chu Mizoram-ah Serchhip District-te a tuar nasa bertu an nih thu leh Serchhip District-ah pawh a Bial, Hrangturzo Bial te chu a tuar nasa zual an nih thu a sawi a. Lui kawrte ringa Leilet siam an tam avangin tuilianin chung kawrte leilet te chu a thuah nasa a, an Leilet bial mai bakah tuikawng thlenga tuilianin a tihchhiat thu a sawi a, chungte chu Sawrkar Department hrang hrangte nen tangho-a an phurrit chhawkna tur an ngaihtuah zel tur thu a sawi a. Leilet neitute hian an leilet awmna kalkawng, Agriculture Link Road hrang hrangte chu leiminin a hnawhphui nasa tih sawiin, Tractor a luh theih loh chuan leilet an siam theih dawn loh thu an thlen chu a theih ang anga MLA Fund hmanga tih tlang an tum thu a hrilh a ni.

Hrangturzo Bialtu MLA hian nimin khan Leng khuaa leilet neitute leh kuthnathawktu khuarel chhiatna avanga harsatna tawk mekte kawmin an harsatna te an lo thlen bakah chhiatna thlengte a enfiah bawk a. Hei bakah hian North Vanlaiphai High School building chhia chu enfiahin, a cheithat dan tur leh hmalak zel dan tur khawtlang hruaitute a sawipui nghal bawk.

Heng khaw hrang hrang a tlawhna ah hian Bialtu MLA hi VC ten lo dawngsawngin khawtlang mamawh chi hrang hrangte an lo thlen bawk a, a Bial chhunga khuarel chhiatna tuar khua thenkhat a tlawh theih tak loh te pawh a khaw hnai remchangah VC ten lo hmuin, an harsatna te an thlen hlawm bawk a. MLA hian Serchhip District Bawrhsap chu a Office-ah hmu nghalin, a Bial chhunga chhiatna thleng avanga a Bial mipuiten harsatna an tawh mek sutkian dan tur a sawipui nghal a ni.